Muqdisho (Caasimada Online) – Bankiga Dhexe ee Soomaaliya ayaa ku dhowaaqay qorshe uu ku beddelayo lacagta kaliya ee dalka uu leeyahay kahor sanadka xigga si wax looga qabto lacagaha been abuurka ah. Lacag 1,000-shilling ah oo dib loo naqshadeeyey ayaa lagu beddeli doonaa lacagta hadda jirta oo markii ugu dambeysay la daabacay kahor inta aanu billaaban dagaalkii sokeeye 1991-kii, waxaa sidaas sheegay guddoomiye ku-xigeenka Bankiga Dhexe Cali Yaasiin Wardheere oo wereysi siiyey warbaahinta Bloomberg. Lacagtii hore ayaa qarka u saaran inay meesha ka baxdo, soo saarista cusubna waxay la-dagaalami doontaa lacagaha sharci darrada ah iyo in la-xakameeyo sicir-bararka iyadoo la baabi’inayo lacagaha xad dhaafka ah, ayuu yiri Cali. Lacagta shillinka ah ee weli suuqa ku jirta ayaa ah mid aad u duugowday, waxaana lagu beddelay lacago dollar ah ama lacago si gaar ah loo daabacay oo intooda badan ah lacago been abuur ah. Bankiga Dhexe ee Soomaaliya ayaa tan iyo 2018-kii ku howlanaa beddelka lacagta iyo soo-saarista lacag qiime sare leh, isagoo kaashanaya hay’adda lacagta adduunka ee IMF iyo Bankiga Adduunka, ayuu yiri Cali Yaasiin Wardheere. Bankiga Dhexe waxa uu sidoo kale dib-u-dhisayaa awooddisa, oo uu la degay dagaalkii sokeeye. Bangiga Dhexe ayaa qorsheynaya in bisha June ee sanadkan uu xarumo cusub ka sameeyo caasimadaha dowlad goboleedyada sida Garoowe, Baydhaba iyo Kismaayo, sida uu sheegay guddoomiye ku-xigeenka oo la magacaabay bishii November. Laamahan waxay ka caawin doonaan Bankiga Dhexe uruurinta canshuuraha, keydinta lacagaha iyo inay noqdaan wakiilka dhexe ee maaliyadda ee dowlad goboleedyada, ayuu yiri. Bankiga ayaa sidoo kale sameeyay cutub “si gaar ah ugu heellan la-dagaalanka suuqa lacagaha been abuurka ah,” ayuu yiri Cali. Cutubkan ayaa sidoo kale mas’uul ka noqon doontaa ilaalinta qiimaha lacagta cusub ee Bankiga Dhexe uu qorshaynayo inuu daabaco, taasina ay gacan ka geysato xakameynta sicir-bararka, ayuu yiri. The post BANKIGA DHEXE oo ku dhowaaqay daabicidda lacag beddeli doonta 1,000-shilling appeared first on Caasimada Online.

Idris Elba & Xaaskiisa Sabrina Dhowre oo Soomaaliya ka soo jeeda ayaa taagero u raadinaya dalal Soomaaliya ku jirto Idris Elba iyo Sabrina Dhowre Jilaaga Idris Elba iyo xaaskiisa Sabrina Dhowre ayaa Isniintii ugu baaqay ganacsatada iyo hoggaamiyayaasha siyaasada inay taageero dheeri ah siiyaan waddamada ugu saboolsan adduunka qaab maalgashi ah halkii ay deeq gargaar ah kasiin lahaayeen. Xafladdii furitaanka shirka sanadlaha ah ee Madasha Dhaqaalaha Adduunka (WEF) ee Davos, ayaa Idris iyo Sabitina lagu abaal mariyay shaqada ay ka qabteen ilaalinta deegaanka, cuntada iyo isbeddelka cimilada. Sabrina Dhowre ayaa soo bandhigtay dhibaatooyinka dhanka cunnada ah ee ka jira Soomaaliya, Haiti, Sudan iyo waddamo kale, iyado si gaar ah diiradda u saaray dhibaatada heysata beeraleyda yar yar ee aan helin agabkii ay u baahnaayeen. “Waxaan halkan u joognaa in aan iftiiminno dhibaatooyinka heysta dadka iyo dalalka aan wararkooda lasoo tebin” ayay tiri Sabrina. Lamaanahan oo sidoo kale ah Danjirayaal Sharafeedka Sanduuqa Caalamiga ah ee Horumarinta Beeraha ee Qaramada Midoobay, ayaa ka codsaday ka qaybgalayaasha shir madaxeedka sannadlaha in si degdeg ah dhaqaale loogu taageero dadka ay saamaysay cunto yari iyo isbeddelka cimilada. “Dadka saboolka ah ee adduunku kaliya ma raadinayaan gargaar iyo deeqo, waxay raadinayaan maalgashi,” ayuu yiri Idris Elba ayaa yiri. Qaran News

Kyiv (Caasimada Online) – Diyaarad Helicopter ah oo ku dhacday deegaanka Kyiv ayaa dishay 17 qof, oo ay ku jiraan wasiirkii arrimaha gudaha ee Ukraine iyo labo carruur ah, sida ay sheegeen mas’uuliyiinta Ukraine. Wasiirka arrimaha gudaha Denys Monastyrskyi, ku xigeenkiisa Yevhen Yenin iyo xoghayihii gobolka ee wasaaradda arrimaha gudaha Yurii Lubkovych ayaa ka mid ahaa dadka ku dhintay shilkan, sida uu sheegay Ihor Klymenko, madaxa booliska qaranka ee Ukraine. Sagaal ka mid ah dadka dhintay ayaa la socday diyaaradii helicopter-ka ee ku burburtay Brovary, oo ah xaafad bari ka xigta caasimadda Ukraine, sida uu sheegay Klymenko. Ilaa hadda ma jiro wax war ah oo ku saabsan in shilkaasi uu ahaa shil iyo in uu ka dhashay dagaalka Ruushka ee socda ku dhawaad 11-ka bilood. 22 qof ayaa sidoo kale ku dhaawacmay oo ay ku jiraan 10 carruur ah. Dhacdo tan lamid ah ayaa sidoo kale todobaadkan ka dhacday dalka Nepal, kadib markii diyaarad ay saarnaayeen illaa 72 qof ay ku burburtay meel u dhaw garoon diyaaradeed oo ku yaalla bartamaha dalkaas, waxaana ku dhintay 68 qof, ayada oo la waayey 4 kal. Diyaaraddaas Yeti Airlines ayaa kasoo duushay magaalada Kathmandu, waxay ku wajahneyd magaalada dalxiiska ah ee Pokhara. Diyaaradda ayaa burburtay xilli ay dageysay isla markaana dab ayaa qabsaday. The post Sawirro: Laba WASIIR oo sare iyo 15 qof oo kale oo shil diyaaradeed ku geeriyooday appeared first on Caasimada Online.

Diyaarado ku sigtay inay isku dhacaan Labo diyaaradood ayaa ku dhawaaday inay isku dhacaan Saraakiisha Mareykanka ayaa bilaabay baaritaan, kadib markii labo diyaaradood oo rakaab ka buuxan, ay ku dhawaadeen inay isku dhacaan garoonka diyaaradaha magaalada New York todobaadkii hore. Diyaaradaha isku dhici gaaray, ayaa xiliga wuxuu ku beegnaa Jimcihii lasoo dhaafay, iyadoo garoonka caalamiga ah ee John F Kennedy, ay isku sigteen diyaaradaha Boeing 777, oo ku wajahneyd Ingiriiska Ingiriiska, iyo Boeing 737 oo ku sii jeeday Jamhuuriyadda Dominican. Mid ka mid ah diyaaradahan, ayaa qorsheynaysay inay kacdo, halka midda kalena ay ka gudbaysay isla dhabbaha ay diyaaraduhu ku ordaan. Isku dhaca shilka, ayaa la baajiyay, markii uu ogaadey ruux ku jira qeybta laga hago diyaaradaha, in labada diyaarad ay isku soo dhowaadeen. Isaga oo isticmaalaya ogeysiin degdeg ah, hagaha hawo-mareenka, ayaa isku dayay inuu joojiyo diyaaradda Delta, xilli ay isku diyaarinaysay in ay baalashada kor u qaado. Diyaarada Delta Air Lines Boeing 737 ayaa markaas ka joogsatay dhabaha ay diyaaraduhu ku ordaan, halka diyaaradda American Airlines Boeing 777, ay si nabad ah uga gudubtay diyaaraddii kale horteeda, abbaare 20:45 EST (01:45 GMT), ayay sheegeen Maamulka Duulimaadyada Federaalka (FAA). FAA ayaa sheegtay in diyaaraduhu ay isu jireen ilaa 1,000ft (300m), markii ay joogsatay diyaarada Delta. Waxaa la bilaabay baaritaan ku saabsan isku dhacan la isku sigtay. Diyaaradda Delta Air Lines, ayaa waxaa la socday 145 rakaab ah iyo lix shaqaale ah, halka diyaaradda labaad ee American Airlines ay la saarnaayeen 137 rakaab ah iyo 14 shaqaale ah. Qaran News

Garoowe (Caasimada Online) – Dowlad-goboleedka Puntland ayaa markii u horeysay ka hadashay fadeexad dhawaan ku soo baxday, taasi oo la xiriirta isku day ay kooxda Deni ku rabeen in barakacayaasha Garoowe u adeegsadaan diiwaan-gelinta doorashada ee ka socota maamulkaasi. Kooxda Deni ayaa loo haysta xad-gudubyo loo geystay dad barakacayaal ah oo degan gudaha caasimadda Garoowe, ayada oo Xafiiska Difaaca Xuquuqda Aadanaha Puntland uu shaaciyay in ay soo gaareen cabashooyin la xiriira arrintan, wuxuuna uga digay xukuumadda inay u adeegsato hantida dadweynaha danaheeda gaarka ah. Qorshaha barakacayaasha loo daad-gureynayay ayaa lagu sheegay in laga diiwaan-geliyo degaanka Beyla oo ka tirsan gobolka Karkaar kadib markii diiwaan-gelinta lagu muransan yahay ee xukuumadda Boosaaso ka bilowday aysan dadweyne badan usoo dareerin. Wasiirka Haweenka iyo Horumarinta Qoyska ee Puntland, Naciima Cabdiraxmaan Guuleed oo la hadashay telefishanka Universal ayaa wax lagu xumaado ku tilmaamtay in barakacayaasha loo adeegsado “diiwaan-gelin qasab ah.” Wasiirada marnaba masoo hadal qaadin fadeexada arrintaan la xiriirta ee dul-hoganeysa maamulka ay ka tirsan tahay, balse waxay ku gaabsatay “in laga waantoobo falalka noocaas oo kale ah.” “Waxaa u arka in dad la daabuleeyo oo deegaan ay joogaan inta laga raro deegaan kale loo raro oo la dhaho iska diiwaan-geliya waa khalad aad u weyn, xuquuqda bini’aadanahana kaga dhac ay tahay,” ayey tiri. “Dowladda waa ku howlan tahay oo si degdeg ah ayaa wax looga qabanayo, cidda kale ee ku foojigan ee rabta in arrintaas ku kacdo waa in ay arrintaas ka istaagan. Waa arrin aan qaadacayo in dad la raro, si gaar ah haweenka iyo caruurta yaryar-ka in la kaxeeyo.” “Tusaale yar ayaa ku sheegaya marka hooyada laga kaxeeyo meesha ay deganeyd ee la geeyo deegaan aysan cidna ka garaneyn fal tacadi bini’aadanimo ah ayey kala kulmi karta oo jidhkeeda loo geysan karo, wasaaradda haweenka arrintaas waa qaadaceysa waana diiday.” Booliska gobolka Nugaal ee degmada Dangorayo ayaa dhawaan qabtay labo gaari oo ah nooca waaraadka ay Soomaalidu u taqaano, kuwaasi oo laga soo buuxiyay barakacayaal u badan haween iyo caruur oo laga keenay Garoowe. Saciid Deni iyo kooxdiisa ayaa raba inay ku gacan sareeyaan mashruuca uu ku dhagan yahay Deni ee “doorashada qof iyo cod” taasi oo mucaaridka maamulkaasi ku tilmaameen mashruuca dib usoo laabashadiisa. The post Kooxda Deni oo ‘si yaab leh’ uga hadashay fadeexadda doorasho ee kusoo baxday appeared first on Caasimada Online.

Dal Yurubiyan ah oo soo celiyay ilig Dahaba oo uu kala baxay Halyey Afrikaanka ah oo uu dilay Maanta oo kale, 17 January 1961 ayay ahayd markii hab-toogasho ah ay halyeygii gobonnimo-u-dirirka Congo ee Patrice Lumumba ku dileen koox dabley ah oo taageero ka helayay gumeystihii hore ee Belgium, waxaana meydkiisa la helay, iyadoo la isticmaalayo curiyeyaal kala duwan oo la sii farsameeyay lagu baabi’iyay aashito. Ilig dahab ah oo sharraxan ayaa ah waxa ka hadhay Lumumba. Taliyihii booliiska Belgian, Gerard Soete, oo kormeerayay kana qaybqaatay baabi’inta hadhaagii maydkiisa ayaa iliggaas qaatay, mar dambe ayuuse qirtay. Waxa kale oo uu xusay inay jiraan ilig labaad iyo labo ka tirsan farihii maydka, laakiin kuwaas lama helin. Iliggii waagaas ayaa sanadkii hore dib loogu celiyay qoyskii uu ka soo jeeday halyeyga, iyadoo lagu guddoonsiiyay xaflad ka dhacday Brussels, caasimadda Belgium. Dareenka Soete ee ahaa inuu jeebka ku sii qaato qayb jidhkii Lumumba ah ayaa loo arkayay tilmaanta falalkii arxandarrada ahaa ee gumaystaha. Waxay dhanka kale muujinaysay hab-dhaqanka nin Belgium ah uu u geysan karo qof uu arkayay cadow. Soete, oo ka soo muuqday filim dukumeentari ah 1999-kii, ayaa ku tilmaamay iligga iyo faraha uu qaatay inay yihiin “nooc ka mid ah halgankiisii ugaadhsiga”. Weedhahan oo tilmaamaya sida uu gumaystihii u arkayay Lumumba – oo qaaradda oo dhan looga qaddariyo inuu yahay cod horseed u ah xorriyadda Afrika. Inanta uu dhalay Lumumba, Juliana, ayaa hadalkaas falcelintiisa ku tilmaantay “In ay su’aali ka taagan tahay in dambiileyaashu ay dhab ahaantii ahaaayeen bani’aadam”. “Nacayb intee la eg ayaa kugu kallifi kara in aad sidaas samayso?” ayay isweydiisay Juliana. “Tani waxay xasuusin u tahay wixii ka dhacay Nazis-ka [Jarmalka], qaadashada qaybo ka mid ah jidhka dadka – taasina waa dambi ka dhan ah bini’aadaninimada,” ayay u sheegtay BBC-da. Lumumba waxa uu noqday raysul wasaare isagoo 34 jir ah. Waxaa la doortay maalmihii ugu dambeeyay ee gumeysiga. Wuxuu madax ka ahaa golihii wasiirrada ee qarankii cusbaa ee xornimada qaatay. Bishii Juun 1960-kii, markii xukunka lagu wareejiyay, Boqorka Belgian, Baudouin wuxuu ammaanay maamulka gumeysiga, wuxuuna ka hadlay awoowihiis, Léopold II, inuu ahaa “ilbixiyihii” dalka. Lama soo hadal-qaadin tan iyo waagaas malaayiintii ku dhimatay ama loo gumaaday xukunkiisa oo markaas loo yaqaanay Congo Free State oo ka mid ahayd hantidiisa gaarka ah. Fashilka ah in la qirto wixii dhacay waayadii hore ayaa sanado badan lagaga hortagayay hab-diidmo ah, taasoo hadda la billaabay wax u dhow in la qirto. Lumumba waxyaabaha lagu xusuusto waayahaas waxaa ka mid ah inuu ahaa nin aan gabban. Khudbad aan la qorsheyn oo uu mar jeediyay raysul wasaare Lumumba ayuu uga hadlay dhibaatada iyo dabargoyntii lagu hayay dadka Congo. Hal-ku-dhegyo xun xun iyo tilmaamo argagax leh ayuu maalintaas ka sheekeeyay, isagoo hadalkiisa ku soo gunaanaday, waxa uu ku tilmaamay “Addoonsiga bah-dilaadda ah ee na lagu soo rogay”.Dadkii Belgian-ka ahaa ayaa la yaabay, sida uu sheegay aqoonyahan Ludo De Witte, kaas oo qoray warbixin taariikhi ah oo ku saabsan dilkiisii iyo taariikhdiisiiWaligeed ma dhicin in Afrikaan madow uu sidaan oo kale ula hadlo dadka Yurub. Raysul wasaaraha, oo De Witte uu sheegay in saxaafadda Belgium ay ku tilmaameen tuug aan waxna qorin waxna akhrin, waxaa loo arkayay inuu bah-dilay boqorka iyo madaxda kale ee Belgium, markii uu khudbaddaas ka hor jeedinayay. Qaar ayaa sheegay in khudbaddiisaas ay ka dhignayd sidii in uu saxiixay amar dil ah in lagu fulin doono, laakiin dilkiisa ayaa ahaa sanadkii ku xigay waqtigii khudbaddaas, iyadoo lagu dilay dagaal-qabow oo qorshihiisu uu ahaa in xukunka lagu ilaaliyo Biljamka. Si kastaba ha ahaatee, waxay u muuqatay in ay jirtay doonis shakhsi ah sida Lumumba loo dilay. Baabi’intii lagu sameeyay jidhkiisa iyo sidoo kale habka looga takhalusay in laga tago wax caddayn ah, taas oo u ekeyd dedaal abaabulnaa oo lagu tirtirayay in wax xusuus ah ay ka hadho Lumumba. Taas oo ka dhigan in xataa shaki la gelin karo in uu jiray iyo in kale. Laakiin, taasi ma aysan hor istaagin in la xusuusto, waayo weli si weyn ayaa loo xusaa. Keliya cidda xustaa ma aha inantiisa, ee waxaaba caddayn ah wafdigii ballaarnaa ee guryo-keenidda iliggiisa u aaday Belgium. ‘Wax ka ogaanshaha tagtadoodii’ Wasiirkii arrimaha dibadda Belgian ee xilligaas, Louis Michel, ayaa xilligaas kaddib muujiyay “raaligelin” iyo sida uu uga xun yahay wixii ku dhacay qoyska Lumumba iyo dadka Kongo. Prof Nzongola-Ntalaja, oo si shakhsi ah ula hadlay BBC, ma rumaysna in Belgium ay si buuxda u aqbashay doorkeedii dilkaas. “Belgium waxay diidday in ay qaadato mas’uuliyadda dilkaas, way og yihiin in ay sameeyeen – laakiin gabi ahaanba ma ahan mid lagu qanco sida ay u maareeyeen” ayuu yiri. Dacwad-oogayaasha Belgian ayaa dilkan ula dhaqmaya mid dambi dagaal ah, balse 10 ka tirsan 12-ka tuhmane ee la aqoonsaday in ay ka dambeeyeen ayaa dhintay, toban sano kaddib, baaritaankuna waxa uu ahaa mid si tartiib tartiib ah isaga socday. Gacan-gelinta iligga waxay noqon doontaa qayb kale oo ka mid ah geeddi-socodka dib-u-heshiisiinta Belgium iyo Congo ee ku saabsan xilligii gumeysiga iyo dhimashadii Lumumba. “Waa tallaabo la qaaday – waxaanan u baahannahay inaan sii wadno,” gabadhiisa ayaa tiri. Laakiin, waxay sidoo kale ku doodeysaa in loo baahan yahay in sidaas oo kale laga wada xisaabtamo dhanka Koongo, maaddaama qaar ka tirsan dadka ay isku dhalashada ahaayeen ay sidoo kale ku lug lahaayeen dilkii aabbaheed. “Waa inaan aqbalnaa taariikhdeenna – wanaag iyo xumaanba.” Aaska iligga – oo la qorsheeyay in lagu beego sanad-guuradii 61-aad ee khudbaddii caanka ahayd ee Lumumba ee maalinta xorriyadda – waxay siin doontaa guud ahaan dadka Congo fursad dib loogu eego wixii horay u dhacay. Qaran News

Muqdisho (Caasimada Online) – Dagaalka caqiidada ayaa iridaha furtay ayada oo Al-Shabaab la kulmayso diidmo Diini ah oo xoogan markii u horeysay. Kadib markii ay kooxda xoojisay xasuuqeeda shacabka, oo ay soo bandhigtay falal argagax leh kuna faantay inay leysay dad Muslimiin ah ayaa culimada Soomaaliyeed billowday in aan intan ka badan Al-Shabaab lagu fiirsan gumaadka shacabka. Waxay markii u horeysay culimada soo saareen go’aamo Diini ah oo dadka u jiheynaya inay iska difaacaan kooxda. Muddo fog waxa Al-Shabaab la dirirayay ciidanka dowladda Soomaaliya oo kaliya, laakiin maanta waxaa u bareeray qabaa’ilkii, culimadii, dhalinyaradii iyo saxaafadii. Dagaalkan jihooyinka badan uga socda Al-Shabaab ayaa waxaa la saadaalinaya in uu xambaarsan yahay dhamaadka kooxda, wallow aan mudada la saadaalin karin. Sheekh Cabdiqani Qorane oo kamid ah culimada Soomaaliyeed ee tobankii sanno ugu dambeysay diidana fikirka kooxda Al-Shabaab ay ku leynayso shacabka Soomaaliyeed ayaa ugu baaqay dadka weli xoolaha siinaya Shabaab inay joojiyaan. Wuxuu ka dalbaday inay u leexiyaan cidda mudan oo ah “kuwa iska difaacaya ee raba inay dadka Soomaaliyeed ka dulqaadan culeyska iyo dhibaatada kooxda Al-Shabaab.” Sheekh Mukhtaar Roobow, Wasiirka Diinta iyo Awqaafta oo hogaaminaya fikirka Diiniga ah ee lagu wajahayo Shabaab ayaa waxa uu sheegay in dhawaan laga adkaanayo Al-Shabaab, isaga oo ugu yeeray inay Khawaarij yihiin. Mukhtaar Roobow ayaa dadka weydiistay inay ciidanka dowladda la shaqeeyaan. Dagaalka fikirka ah ee lala aaday Al-Shabaab ayaa la aaminsan yahay in uu wax badan ka tari doono qorshaha ay Soomaalidu iskaga saareyso Al-Shabaab. Kooxda caadiyan ma jecla in fikir ahaan loola diriro sida ay sheegaan dadka daraaseeya dhaqanka kooxdan. The post Cidda mudan lacagta ay ganacsatada Muqdisho ay siiso maleeshiyada Shabaab appeared first on Caasimada Online.

Muqdisho (Caasimada Online) – Guddoomiyaha maxkamadda gobolka Banaadir oo hadal ka jeediyay munaasibad soo dhoweyn ah oo loogu sameeyay magaalada Muqdisho ayaa waxa uu sheegay in uu is-casili doono, haddii uu isbadal la imaan waayo muddo sanad ah. Guddoomiya Saalax Cali Maxamuud (Dabaan) ayaa waxa uu sheegay in ay ka go’an tahay in uu isbadal weyn ku sameeyo maxkamadda gobolka, gaar ahaan dacwadaha ay qaado iyo cadaalad u sameyntooda. “Waxaa hortiina ka sheega kow in aan guddoomiyaha maxkamadda gobolka Banaadir lacag ka soo doonan, sidoo kale waxaa rabaa in aan ballan-qaado dacwadaha yimaada maxkamadda gobolka in aan ka shaqeyn doono cadaalada laga filayo maxkamadda.” Guddoomiyaha ayaa sidoo kale waxa uu ka codsaday odayaasha dhaqanka iyo dhamaaan bulshada gobolka Banaadir inay ku garab siiyaan qorshihiisa sare u qaadista cadaalada gobolka. “Ujeedkayga waxa waaye sanadka aan hadda joogno January ayaa lagu jira, January soo socota cadaalada gobolka Banaadir wax ma iska badaleen mise waxba iskama badalin su’aashaas idinka in aad ka jawaabtaan.” Waxa uu intaas kusii daray “Hadalka ha yaraado howsha ha badato, in aan hadalno ma rabno laakiin waxaa rabna in wax la taaban karo in sanad ka dib maxkamadda gobolka wax ka badalmi waayaan waa ka taga meesha.” Arrintan ayaa imaneysa ayada oo garsoorka gobolka, iyo guud ahaan midka dalka laga deyrinayay, wallow uu muddooyinkii dambe sameynayay isbedelo muhiim ah, sida uu sheegay guddoomiyaha maxkamadda sare ee dalka. Guddoomiyaha Maxkamadda sare ee dalka Garyaqaan Baashe Yuusuf Axmed ayaa dhawaan shir sanadeedkii Garsoorka ka sheegay “in weli loo baahan yahay in dagaal adag loo galo sidii uu dalka uga shaqeyn lahaa garsoor cadaali ah oo madax-banaan.” The post Guddoomiyaha Maxkamada gobolka oo shaaciyay inuu is-casilayo haddii uusan… appeared first on Caasimada Online.

Muuqaal: Hadal-jeedinta Xasan Sheekh Madaxweynana dowladda federaalka Soomaaliya Xasan Sheekh Maxamuud ayaa furay shirka dib-u-heshiisiinta Koonfur Galbeed oo shalay galinkii dambe ka furmay magaaladda Baydhabo. Madaxweynaha Dowladda Koonfur Galbeed Cabdicasiis Xasan Maxamed Laftagareen ayaa ka qeyb galay furitaanka shirka, waxaa sidoo kale ka qeyb galay Guddoomiyaha Golaha Shacabka Baarlamaanka Shekh Aadan Maxamed Nuur (Madoobe) siyaasiyiin, odeyaasha dhaqanka iyo qeybaha kala duwan bulshada. Madaxweyne Xasan Sheekh oo hadal ka jeediyay furitaanka shirka ayaa ku adkeeyey madaxda, waxgaradka iyo haldoorka in ay ilaashaadaan dowladnimada, nabadda iyo wadajirka heer Koonfur Galbeed. “Dadka reer Koonfur-galbeed, hoggaankooda siyaasadeed, mucaarad ha ahaadaan ama muxaafad, odeyaashooda dhaqanka, dhallinyarada iyo dhammaan qeybaha bulshada rayidka ah, waxaan rabnaa in ay isla fariistaan oo mushkiladahooda xallistaan” ayuu yiri Madaxweyne Xasan Sheekh. Madaxweyne Xasan Sheekh Maxamuud ayaa sheegay in uu ku kalsoon yahay miro-dhalka wada-hadalladan ka furmay Baydhabo iyo sida ay uga go’an tahay dhammaan reer Koonfur Galbeed in ay xalliyaan tabashooyinka siyaasadeed ee ay isu qabaan. PUNTLAND POST The post Shirka dib-u-heshiisiinta Koonfur Galbeed oo furmay appeared first on Puntland Post.

Wasiirka Arrimaha Dibadda iyo Iskaashiga Caalamiga Soomaaliya Abshir Cumar Jaamac ayaa Muqdisho ku soo dhoweeyay Wasiirka Arrimaha Dibedda iyo Jaaliyadaha ee dalka aan walaalaha nahay ee Yemen, Dr. Axmed Cawad bin Mubarak oo booqasho seddex maalmood ah uga bilaamatay Soomaaliya. “Dalka Yemen oo aan wadaagno xiriir qoto dheer oo leh dhinacyada dadka, taariikhda, dhaqanka iyo dhaqaalahaba waxaan iska kaashanaynaa sidii aan u sii xoojin lahayn xiriirkaas soo jireenka ah” ayuu yiri Wasiirka Arrimaha Dibadda Soomaaliya. “Inta uu wasiir Dr. Axmed joogo dalka waxaan wada yeelan doonnaa wadahadallo la xiriira arrimaha labada dal. Sidoo kale wasiirku wuxuu booqan doonaa qaar ka mid ah xarumaha dowladda, wuxuuna la kulmi doonaa madaxda sare ee dowladda qaarkood” ayuu raaciyay wasiir Huruuse. PUNTLAND POST The post Wasiirka Arrimaha Dibadda Soomaaliya oo Muqdisho ku soo dhoweeyay dhiggiisa Yemen appeared first on Puntland Post.

Baydhaba (Caasimada Online) – Madaxweynaha Soomaaliya ayaa digniin ka soo saaray qorshaha ciidanka la magac baxay badbaadada Koonfur Galbeed ee isku uruursanaya qeybo ka mid ah magaalada Baydhaba “Ciidankaan waa in deg deg ay Deynuunaay ugu laabtaan,” ayuu yiri. Ciidankaan waxaa hoggaaminaya siyaasiyiinta qaar, kuwaas oo ka hor yimid mudo kordhintii loo sameeyey madaxweynaha maamulkaas Cabdicasiis Laftagareen, “Dowladda K/Galbeed waxaan ka rabaa in dadka aan la gaarsiin duruuf ku kalifta inay hubka qaataan, waana ka balanay Madaxweyne Cabdicasiis,” ayuu yiri Xasan Sheekh. Madaxweyne Xasan Sheekh ayaa digniin culus siiyey ciidanka, isagoo ku amray in qof aan Shabaab aheyn aysan xabad ku ridin, sidoo kale siyaasiyiinta ayuu ugu baaqay in ciidanka aysan kala furfurin oo siyaasadda aysan u adeegsan. “Ciidanka dowladda lagama aqbali doono inay ku dhex milmaan siyaasadda, oo ay dadka dhibaateeyaan, ilaa hadda ma jiro nin maxkamad looga yeeray, waxaan ku amrayaa ciidanka inay xeryahoodii ku laabtaan,” ayuu yiri Madaxweyne Xasan Sheekh. Madaxweynaha ayaa si cad u sheegay in ciidanka uu ugu tala-galay inay Shabaab la dagaalamaan, balse uusan jirin siyaasi uu ka ogolaanayo in ciidanka dowladda uu mansab xoog ah ama dano u gaar ah uu ku raadsado. “Wiilasha hubka sita ee magaaladaan soo galay saacado ayaan u qabtay, maanta ayaan la sugaayey in halkaan aan ka sheego, ciidankaas waa in deg deg uu ugu laabto xeryihiisa” ayuu yiri. Madaxweynaya ayaa odayaashii dhaqanka ee ka soo qeyb galay shirka dib u heshiisiinta ah ee Baydhaba ka socda wuxuu u sheegay in askarigii caawa u hoya waaya xeradii ay ku ogeed dowladda federaalka aan berri cabasho laga aqbali doonin oo dowladdu ay tallaabo ka qaadi doonto. “Dadka ciidamada kala furfuraaya kama ogolaa doono. Nin aan u ogolnahay in qof kale uu xabad ku rido ma jiro, saan ayey aniga ila tahay uma socaneyso siyaasi ciidan hubeysan wata,” ayuu yiri. Madaxweyne Xasan Sheekh ayaa ku goodiyey in la ruqsey doono oo ciidanka laga saari doono askarta ka mid noqotay ciidanka badbaadada K/Galbeed ee taabacsan siyaasiyiinta qaar, waa hadii aysan deg deg ugu laaban xeryahooda. “Waxaa jira wilal kale oo jecel inay ku biiraan ciidanka qaranka, kuwaas oo dowladdu ay tabar u weysay, ogaada inta kuwaan ruqseyno, ayaan kuwaas fursad sii doonaahe,” ayuu hadalkiisa ku sii daray Madaxweynaha Soomaaliya Xasan Sheekh. The post Go’aan culus: Xasan Sheekh oo saacado u qabtay ciidanka ‘Badbaadada K/Galbeed’ appeared first on Caasimada Online.

Minneapolis (HOL) - Minnesota Attorney General's office has filed a lawsuit against an Edina nonprofit that served as a site for the infamous Feeding Our Future scandal. Source: Hiiraan Online

Jabuuti (Caasimada Online) – Madaxweynaha dowlad-goboleedka Jubaland ayaa Axadii gaaray magaalada Jabuuti ee caasimada Jamhuuriyada Jabuuti, halkaasi oo ay si weyn ugu soo dhaweeyeen Wasiirka arrimaha dibada Jabuuti Mudane Maxamuud Cali Yuusuf iyo masuuliyiin kale oo katirsan dowlada Jabuuti. Axmed Madoobe oo booqasho rasmi ah uga bilaabatay Jabuuti ayaa waxa uu safarkiisa yimid kadib markii uu casuumaad ka helay madaxweynaha dalkaas Ismaaciil Cumar Geelle. Sida ay ogaatay Caasimada Online, marti-qaadka uu Geelle u fidiyay Axmed Madoobe ayaa leh labo ujeedo oo kamid tahay in Axmed Madoobe lagu qanciyo inuu ku biiro heshiis ay hore u wada-galeen Xasan Sheekh, Muuse Biixi iyo Geellaha Jabuuti. Xogaha aan helayno ayaa intaas ku daraya in khilaafka Xasan Sheekh Maxamuud iyo Saciid Cabdullaahi Deni ay qayb ka tahay sababaha xilligaan loo soo dhaweynayo Axmed Madoobe, oo kal hore ay xulafo siyaasadeed ahaayeen Deni. Waxaa muddooyinkii dambe si weyn usoo baxday in madaxweynaha dalka Jabuuti uu ku qanciyay Muuse Biixi iyo Xasan Sheekh Maxamuud inay ogolaadaan howl-galka Justified Accord iyo arrimo kale oo aan xog fiican laga wada hayn intii lagu guda jiray munaasibadii aroos siyaasadeedka aheyd ee loo sameeyay gabadha madaxweyne Geelle. Justified Accord ayaa ujeedada laga leeyahay waxaa lagu sheegay in sare loo qaado iskaashiga caalamiga ah ee wax ka qabashada dhibaatooyinka iyo hawl-galada ka hor taga argagixisada iyo in la-diyaariyo ciidamo goboleed qayb ka noqda hawl-galada QM iyo Midowga Afrika. Dalalka howl-galkan ku midoobay oo qeyb ka tahay Soomaaliya ayaa la qorsheynaya in bisha Febraayo ee sanadkaan ay dhoola-tus millateri kusoo bandhigaan magaalada Berbera, taasi oo koox ciidamo iskugu jira oo Mareykan ah oo shaqo wadaag ah ay dhawaan booqasho indha-indheyn ah ku tageen magaalada Berbera. Booqashadan ayaa ku soo beegantay ka hor tababar laylis ciidan ah oo la qorsheynayo inay ka qayb qaataan dalal badan oo ay horkaceyso dowladda Mareykanka, oo loogu yeeray Justified Accord. Dhanka kale, waxaa iyadna jira wallaac ka dhashay arrintan oo la xiriira inuu qorshuhu intaas ka weyn yahay, oo waxaa jira guux faro badan iyo hadal hayn la xiriirta arrintan oo durba dadka qaar ay muujinayaan, taasi oo salka ku haysa in ujeeda guracan oo ‘khayaan ah’ ay ku hoos qarsoon tahay howl-galka loogu magaca daray Justified Accord. Dadka arrintaan ka walaacsan ayaa qaba in dowladda Mareykanka ay ku soo galbineyso ciidamada badda ay dhawaan sameysatay dowladda Itoobiya si xeebaha Soomaaliyeed saldhig looga dhigo. Waxaa dadka qaba doodan ayaa cuskanaya war shaki badan dhaliyay oo bishii la soo dhaafay uu warbaahinta ka sheegay sarkaalka ugu magacaaban ciidankan Itoobiya ee la yiraahdo Kundu Ghele, kaasi oo sheegay in ciidamada badda ee ay sameysatay Itoobiya ay ilaalin doonaan xeebaha dalalka deriska ah. Itoobiya ayaa dhowr jeer ka gaabsatay inay si cad u sheegto in ciidamadeeda ay ka howl-gali doonaan xeebaha Soomaaliyeed, taasi oo hadda u muuqata in Geelle loo xil-saaray taageero u helida ololahaas ee dowladda federaalka iyo maamul-goboleedyada dalka. The post Xog: Qorshaha Geelle ugu yeeray Axmed Madoobe oo ku sugan Jabuuti + Sawirro appeared first on Caasimada Online.

Baydhaba (Caasimada Online) – Madaxwaynaha Soomaaliya Xasan Sheekh Maxamuud oo furay shirka dib u heshiisiinta Koonfur-galbeed ayaa ku adkeeyey madaxda, waxgaradka iyo haldoorka reer Koonfur-galbeed in ay ilaashaadaan dowladnimada, nabadda iyo wadajirka heer dowlad-goboleed. Madaxweynaha ayaa xusay in dadka Soomaaliyeed ay ka daaleen colaad sokeeye, iyadoo wixii soo dhacayey 30-kii sano ee la soo dhaafay ay inoo yihiin cashar nagu jiheynaya horumarka iyo nabadda, maanta halka cadow ee aynu leenahayna uu yahay argagixisada Alshabaab, la dagaallankooduna uu yahay kan kaliya ee inoo furan. “Dadka reer Koonfur Galbeed, hoggaankooda siyaasadeed, mucaarad ha ahaadaan ama muxaafad, odeyaashooda dhaqanka, dhallinyarada iyo dhammaan qeybaha bulshada rayidka ah, waxaan rabnaa in ay isla fariistaan oo mushkiladahooda xallistaan” ayuu yiri Madaxweyne Xasan Sheekh. Madaxweynaha ayaa soo bandhigay in uu ku kalsoon yahay miro-dhalka wada-hadalladan maanta ka furmay Baydhaba iyo sida ay uga go’an tahay dhammaan reer Koonfur Galbeed in ay xalliyaan tabashooyinka siyaasadeed oo ay kala qabaan. Madaxweynaha ayaa sheegay in hadii siyaasiyiinta reer K/Galbeed ay heshiiyaan ay fududaa doonto xoreynta deegaanada ay argagixisadu ku dhibaateynayso dadka shacabka ah ee deegaanadaas ku nool. “Hal cadow ayaan leenahay waana argagixisada Al-Shabaab, Dowladdu waxay sameysay qorshe dalka lagaga xoreynayo kooxda, wajigii koowaad ayaa hadda gabo-gabo ah, wajiga labaadna waxaa ugu horreysa Koonfur-galbeed, oo halkaan ayaa ka bilaabeynaa,” ayuu hadalkiisa ku sii daray Xasan Sheekh. Madaxweynaha ayaa ugu baaqay dhammaan dhallinyarada Soomaaliyeed ee ku jirta fikirka gurracan ee Al-Shabaab in ay ka soo laabtaan, isagoo cafis u fidiyey mid kasta oo ka mid ah oo u soo laabta dadkiisa iyo dalkiisa, dowladduna ay diyaarisay qorshe dhaqancelin iyo nolol wanaagsan looga sameynayo dhallinyarada ay khaldeen Al-Shabaab. Hoos ka daawo The post Daawo: Madaxweyne Xasan oo furay shirka Baydhaba, farriin culusna soo saaray appeared first on Caasimada Online.

Madaxweynaha Puntland Siciid Cabdullaahi Deni oo maanta tababar u soo xiray cutubyo ka tirsan ciidanka Asluubta Puntland ayaa ka hadlay federaaleynta, la dagaalanka Al-shabaab iyo diiwaangelinta lagu muransan yahay ee ka socota gobollada Bari. Madaxweyne Deni ayaa hadal jeedintiisa kaga hadlay howlgallada dalka looga xoreynayo argagixisada, isagoo boggaadiyay guulihii ugu danbeeyay ee laga gaaray la dagaalka Al-shabaab, wuxuuna hambalyo u diray dowladda Galmudug, ciidanka xoogga dalka iyo shacabweynaha isu taagay iska dul kicinta Al-shabaab. Sidoo kale Madaxweynaha Puntland ayaa iftiimiyey hannaanka dowladu u wajahday qodobadda dastuuriga ee ay Puntland ku diiday in ay saxiixdo heshiiskii Muqdisho, oo ay ugu horeyso guddiga loo saaray si ay u diyaariyaan wada xaajoodka arrimaha federaaleynta dalka. PUNTLAND POST The post Madaxweyne Deni oo ka hadlay federaaleynta, la dagaalanka Al-shabaab iyo arrimo kale appeared first on Puntland Post.

Mogadishu (HOL) - Two Al Shabaab members were sentenced to death on Tuesday for their role in the murder of a government security official. Source: Hiiraan Online

A young man from North London who had to rush back home from his honeymoon after receiving the heartbreaking news of his mother's death has raised enough money in her memory that he plans to build a mosque to honour her. Source: Hiiraan Online

Muqdisho (Caasimada Online) – Xildhibaan Cabdullaahi Maxamed Cali (Sanbaloolshe) oo ka tirsan Golaha Shacabka, kana mid ah mas’uuliyiinta hogaaminaya dagaalka ka dhanka ah Al-Shabaab ayaa sheegay in Galmudug kadib ay howl-galada dagaal u jiheysan doonaan Galbeedka Webiga Shabeelle. Sanbaloolshe ayaa sidoo kale waxa uu sheegay in dagaalada ka socda gobolada dalka khasaare xoogan lagu gaarsiiyay Al-Shabaab, si ay u aarsadaan ay u sameynayaan qaraxyo uu tilmaamay in laga feejigan yahay marka laga tusaale qaato goobaha ay ka dhaceen. “Dagaalku marna waa sugid ammaan marna waa fool ka fool la iska soo horjeedo, marka hore waa in cadawga la naafeeyo oo la burburiyo saldhigyada uu kasoo duulo, sida aan aaminsanahay waa rafashadii ugu dambeysay,” ayuu yiri. “Maalmaha soo socda labo kacleyn ayaa lagu sameyn doonaa la dagaalanka Shabaab, hay’adaha amaanka waxaa rajeynaa in ay sugaan amniga, dagaalka inta badan hal dhinac kama socda, marka lasoo gaba-gabeeyo dagaalka Galmudug waxaa loo jiheysan doona Galbeedka Webiga Shabeelle ee Hiiraan & Shabeelaha Dhexe.” Qaraxyada Shabaab ee gobolka Hiiraan oo uu ku tilmaamay naf la-caarigii u dambeeyay ee kooxda ayaa waxa uu sheegay in ay xilligaan u kordhisay si ay u muujiyaan in weli saameyn leeyihiin. “Inta badan Webi Shabeelle dhiniciisa bari waa laga xorreeyay, magaalooyinka qaraxyadu maalmahaan ka dhacayeen waa magaalooyinka ugu waaweyn ee gobolka Hiiraan sida Jalalaqsi, Buulo-burte, Maxaas iyo Halgan, sababtuna waxa ay tahay in la qabtay Xarardheere, Ceeldheer iyo Galcad marka way ogaayeen in maalmaha soo socda magaalooyin waaweyn gacanta ka bixi doonaan si ay dadka u marin-habaabiyaan oo ay u tusaan in ay weli nool yihiin ayay weeraradaan u qaadayaan.” Waxa uu intaas sii raaciyay hadalkiisa “Waa ay ku guul-dareysteen furimaha iyo dagaalka fool ka foolka ah oo wax ay ku keeni waayeen ayay si cadawtinimo ah uga aarsanayaan dadweynaha una xanuujinayaan.” Ugu dambeyntiina waxa uu sheegay “si loo yareeyo dhaq-dhaqaaqa ay Shabaab sameynayaan si ay u abaabulaan qaraxyo loo jiheysto deegaanada dhaca Galbeedka Webiga Shabeelle.” The post Sanbaloolshe oo shaaciyay halka uu dagaalka u jihaysan doono kadib GALMUDUG appeared first on Caasimada Online.

Hargeysa (Caasimada Online) – Somaliland ayaa si weyn uga hortimid in safiirka Mareykanka ee Soomaaliya uu Somaliland uga hadlo sidii gobol kamid ah Soomaaliya, kadib qoraal kasoo baxay wasaaradda arrimaha dibadda Somaliland. Qoraalka kasoo baxay wasaaradda ayaa waxa lagu sheegay “in arrintaas ay tahay wax aan la aqbali karin”, maadama uu Larry indhaha ka lalinayo gooni isu-taagga iyo madax-banaanida ay ku doodo Somaliland. “Waa wax aan la aqbali karin in Larry Andre oo ah safiirka Mareykanka ee Muqdisho uu si joogto ah uga fogaado in uu Somaliland ugu yeedho magaceeda saxda ah oo uu ku tilmaamo gobol ka mid ah Soomaaliya, uuna Berbera la xidhiidhiyo Soomaaliya in kasta oo uu si fiican u og yahay in Somaliland aanay ahayn gobol ka mid ah Soomaaliya,” ayaa lagu yiri qoraalka kasoo baxay wasaaradda arrimaha dibadda. Qoraalka kasoo baxay Somaliland ayaa daba socda qoraal ay Axadii soo saartay safaarada Mareykanka ee Soomaaliya, kaasi oo lagu sheegay in Mareykanka iyo xulufo kale ay Berbera ku samayn doonaan dhoolatus millateri, kaasi “oo aan meelna lagaga xusin magaca Somaliland.” Sidoo kale waxa qoraalka Mareykanka lagu sheegay in dhoolatusyo lamid ah ka Berbera ay ka dhici doonaan waddamada Botswana, Jabuuti, Kenya, Uganda iyo Rwanda, kaasi oo ay ka qayb-gali doona illaa 20 waddan oo Soomaaliya ku jirto. Mareykanka ayaa waxa uu Berbera u arka goob hoy u noqon karta abaabulka howl-galada uu ku sugayo amaanka gobolka, isaga oo aaminsan mabda’a midnimada Soomaaliya, taasi oo ay diidan tahay Somaliland oo ayadu ku dooda inay tahay dal ka madax-banaan Soomaaliya. Somaliland iyo Mareykanka ayaa lagu wadaa in ay dhawaan yeeshaan iskaashi millateri iyo mid siyaasadeed, kadib markii uu madaxweyne Biden saxiixay xeer ogolaanaya in labada dhinac yeeshaan wada-shaqeyn noocaan ah. The post Somaliland oo weerar ku qaaday safiirka Mareykanka ee Soomaaliya kadib markii… appeared first on Caasimada Online.

Guddoomiyaha maxkamadda ugu sarreysa dalka Itoobiya, Meaza Ashenafi iyo ku xigeenkeeda Solomon Areda ayaa si lama filaan xilkii iskaga casilay. Ma sheegin sababta ay isku casileen. Meaza Ashenafi oo hore ugu ololeyn jirtay arrimaha haweenka ayaa sannadkii 2018 loo magacaabay xilkan, waxaana loo arkay tallaabo isbaddal ah oo uu waday Abiy Axmed markii uu xilka qabtay. Tan iyo dabayaaqadii 1980s waxay aheyd garsoore ka tirsan maxkamadda sare ee Itoobiya, waxay markii dambe sameysay urur ay ku mideysan yihiin haweenka qareenka ah ee Itoobiya si ay u caawiyaan haweenka u baahan adeegyada sharciga ah. Meaza Ashenafi waxay ku lug laheyd kiis caan ahaa oo xitaa lagu soo bandhigay filimka Hollywood-ka ay soo saare ka aheyd Angelina Jolie Source

Muqdisho (Caasimada Online) – Ciidamada Booliska ee magaalada Muqdisho ayaa goordhoweyd toogtay nin hubeysan oo la sheegay inuu burcad ahaa, kaasi oo ay cabasho ka muujiyeen dadka shacabka. War kasoo baxay taliska ciidanka booliska ee gobolka Banaadir ayaa lagu sheegay in ninkaan la toogtay kadib markii iska hor-imaad uu la galay ciidanka booliska saldhiga degmada Yaaqshiid. Sidoo kale waxa lagu sheegay qoraalka kasoo baxay taliska in ninkaan uu watay Mootada nooca Bajaajta oo ay gacanta kusoo dhigeen ciidamada. “Ciidanka ayaa burcadkaan ku qabtay xaafada Carafaat isaga oo ka dhaga adeegay amarka Ciidanka Ammiga kadibna isku dayay inuu baxsado, waxa uu watay Moota nuuca Bajaajta ah oo ay hada hayaan ciidanka Amaanka,” ayaa lagu yiri qoraal kooban oo kasoo baxay taliska. Ciidamada ammaanka ee magaalada Muqdisho ayaa sare u qaaday howl-galada lagu baacsanayo burcadda, ayada oo maalmihii lasoo dhaafay ku guuleysteen inay soo qabtaan ku dhawaad 20 rag ah oo dadka dhaceysay. Shalay unbey aheyd markii Booliska gobolka Banaadir uu soo bandhigay sawirrada 5-rag ah, hub ay wateen iyo gaari ay ka dhaceen dad shacabka, kuwaas oo la qabtay iyagoo baxsad ah. Ragaan ayaa laga soo qabtay degaanka Garasbaaley ee duleedka Muqdisho, iyagoo la baxsanaya gaariga ay dhaceen iyo taleefoono kale oo dad shacab ay ka uruursadeen. Ragaan ayaa gaari nooca raaxda ah kala degay dadkii watay, kadib markii ay ka afduubteen meel u dhow garoonka cayaaraha ee Stadium Eng. Yariisoow ee degmada Cabdicasiis. “Kooxdaan burcadka ah oo ka kooban shan rag ah oo watay qoryaha AK47 ayaa gaariga ku joojiyay isgooska Ex control, halkaas oo ay ku baarteen dadkii saarnaa gaariga iyaga oo ka qaatay dhamaan taleefanadii ay wateen, kadibna iska dajiyay dadkii shacabka ahaa,” ayaa lagu yiri qoraal ka soo baxay booliska. Magaalada Muqdisho markii laga soo tago falalka argagixiso ee sababa dilalka madax-jebiska ah iyo qaraxyada, waxay dadkeedu qaati ka taagan yihiin dhaca tuugada, mararka qaarna waxaa dhacda in qofka loo dilo agabka uu wato dartiis. The post Ciidamada booliska oo nin hubeysan ku dilay Muqdisho appeared first on Caasimada Online.

Taliyaha sirdoonka dalka Turkiga Hakan Fidan ayaa wadahadallo la yeeshay madaxda militeriga ee Suudaan, waxay ka wadahadleen in la is-waydaarsado xogta sirdoonka iyo arrimo kale oo dan u ah labada dal. Hakan Fidan wuxuu kulan gaar ah la yeeshay madaxa golaha sare ee ka taliya Suudaan , janaraal Cabdul Fataax Al Burhaan iyo ku xigeenkiisa, Maxamed Xamdan Dagalo, waxaana goob joog ka ahaa taliyaha sirdoonka Suudaan Axmed Ibraahim Mufadal. Taliyaha sirdoonka Turkiga uu siday farriinta ah in dalkiisa uu taageerayo heeshiiska ay dhinacyada Suudaan ka gaareen qaab dhismeedka heshiis lagu soo afjaro xiisadda siyaasadeed. Turkiga ayaa ka mid ahaa dalalka beesha caalamka ee taageeray heshiiskan, kaas oo loogu talagalay in lagu soo celiyo xukunkii rayidka ahaa ee Suudaan. Source

Hoos u dhac ayaa ku yimid tirada bulshada Shiinaha markii ugu horreysay muddo 60 sanno ah iyadoo diiwaanka carruurta dhalaneyso uu gaadhay heerkii ugu hoseeyay- tusaale 1000 qof waxay dhalaan 6.77 carruur ah. Tirada bulshada Shiinaha sannadkii hore waxay gaadhay-1.4118 billion- tiradaas oo ka yar 850,000 qof tiradii la diiwaangeliyay sannadkii 2021-ka. In muddo ah waxaa uu hoos dhacayay tirada carruurta Shiinaha, arrintaas oo keentay in isbaddal lagu sameeyo siyaasaddii ilma dhalidda lagu yareyanayay. Markii ugu dambeysay uu hoos dhac yimaado tirada dadka Shiinaha waxay aheyd lixdamaadkii markaasoo uu dalkan la daalaa dhacayay dhibaatooyin ka dhashay macluul. Source

Source

Muqdisho (Caasimada Online) – Madaxweynihii hore HirShabelle Cali Cabdullahi Cosoble ayaa ka hadlay mowqifkii ay dhawaan ku dhawaaqday Madaxtooyada Puntland, kaasi oo uu ku macneeyay ‘kibir’. Cali Cosoble ayaa faallo dheer arrintaan ka qoray, taasi oo cinwaan uga dhigay “Puntland ma necbi ee kibirkeedaan nacay” wuxuuna ku iftiimiyay in Puntland ay faa’iido ku qabto dowladda federaalka, ayna ku jirto danteeda, sida uu sheegay. “Puntland ma laha beero mana laha warshado iyo wax soo saar ee waa dukaan wax soo iibsada siina iibiya. Horumarkeeda wuxuu salka ku hayaa macaashka ay ka hesho macaamiisheeda oo ah dadka dega Galgaduud, Hiiraan, Bay, Bakool, Shabeelooyinka iyo Jubbooyinka,” ayuu yiri. Waxa uu sheegay in Puntland sinnaba uga qeyb qaadan horumarka ka socda dalka intiisa kale, islamarkaana ay taqaano oo kaliya “nidaamka federaal ee ay danteeda mustaqbalka ku jirto.” Hoos ka aqriso qoraalka oo dhameystiran: Puntland ma necbi ee kibirkeedaan nacay. Puntland! Puntland! Puntland! – Horta Puntland ma ayadaa faa’iido ku qabta Koonfur iyo dowladda federaalka mase Koonfur iyo dowladda federaalka ayaa faa’iido ku qaba Puntland? Puntland ma laha beero mana laha warshado iyo wax soo saar ee waa dukaan wax soo iibsada siina iibiya. Puntland waxay aad u sheegataa inay ku tallaabsatay horumar aad u ballaaran marka loo eego degaannada ka xiga Koonfur. Been ma aha laakin horumarka Puntland xaguuu salka ku hayaa? Puntland ma laha beero mana laha warshado iyo wax soo saar ee waa dukaan wax soo iibsada siina iibiya. Horumarkeeda wuxuu salka ku hayaa macaashka ay ka hesho macaamiisheeda oo ah dadka dega Galgaduud, Hiiraan, Bay, Bakool, Shabeelooyinka iyo Jubbooyinka. Puntland waxay canshuur ka qaadaa xoolaha nool iyo dalagyada ka baxa gobollada Koonfur ka xiga ee ay ganacsatadeeda iibsadaan dibaddana u sii iib geeyaan. Sidoo kalana waxay canshuur ka qaadaa shacabka ku nool gobollada koonfureed ee iibsada badeecooyinka ay ganacsatadeeda keento. Puntland wax canshuur ah kuma soo xareyso qasnadda dowladda federaalka, halka ay shacabka ku nool gobollada kale ee Koonfurta Soomaaliya bixiyaan canshuurta ay dowladda dhexe mushaarka uga dhigto ciidamada, shaqaalaha dowladda iyo xildhibaannada dalka. Puntland sinnaba ugama qeyb qaadato horumarka ka socda dalka intiisa kale waxayna ku adeegataa kuna macaashtaa kaligeed deked ay wax ku leeyihiin Reer Dhuusamareeb, Reer Baladweyne, Reer Xuddur, Reer Beydhabo, Reer Jowhar, Reer Marko, Reer Bu’aale, Reer Kismaayo, Reer Garbaharrey, iyo weliba Ree Laascaanood, Reer Burco iyo barakacayaasha ku nool gobollada dalka. Puntland ma taqaano nidaamka federaal ee ay danteeda mustaqbalka ku jirto balse waxa ay dooneyso waa inaan la fara gashan oo ay canshuurna ka qaado shacabka Soomaaliyeed. Puntland waxaa laga rabaa iney wax ku soo darsato Soomaaliya waayo qaabka ay hadda u dhaqanto waxba kama duwana Somaliland, keliya danteeda awgeed ayey warkeeda u asluubeysataa. Ganacsataa canshuur bixisana ayadana waa been! Isticmaalaha (consumer) ayaa bixiya canshuur. Ganacsatada qiimaha ay wax ku soo iibsadaan waxay ku daraan canshuurta laga qaado iyo kharashaadka kale, kaddibna wexey ku darsadaan faa’iido. Hadduu loor bariis ah ugu yimaado dalka 10 dollar, dowladduna ka qaado canshuur 1 dollar ah ayagana wexey sii iibiyaan 13 dollar oo marka la faahfaahiyo ka kooban lafihii oo 10 ah, canshuur 1 dollar iyo faa’iido 2 dollar ah. Haddaba ma ganacsadaa bixiya canshuur mase aniga iyo adiga iyo hooyada agoomaha heysata ee ka mid ah barakacayaasha?. Puntland dhaaxey tiri xiriir baan jaray ee culeys intee le’eg ayey dareemi haddii la jaro xiriirka ganacsi ee kala dhexeeya dalka intiisa kale? Puntland ma necbi ee kibirkeedaan nacay. AFEEF: Aragtida qoraalkan waxa ay ku gaar tahay qofka ku saxiixan, kamana tarjumeyso tan Caasimada Online. Caasimada Online, waa mareeg u furan qof kasta inuu ku gudbiyo ra’yigiisa saliimka ah. Kusoo dir qoraaladaada admin@caasimada.net Mahadsanid. The post Cali Cosoble: Puntland ma necbi ee kibirkeedaan nacay appeared first on Caasimada Online.