(SAWIRRO) Dugsiga sare Cumar Samatar oo $500 dollar ugu deeqay dib u dhiska garoonka kubada cagta Gaalkacyo ee Cawaale Stadium.

[Deeq A.]

Ardayda wax ka barata dugsiga sare ee Cumar Samatar ee magaalada Gaalkacyo, ayaa dhaqaale ugu deeqay dhismaha garoonka kubada cagta Cawaale ee magaalada Gaalkacyo, kaasoo la qorshaynayo in laga dhigo garoon casri ah oo caalamka la jaanqaada.

Ardayda Cumar Samatar ayaa guddiga dhismaha garoonka ku wareejiyay lacag dhan $500 Dollar iyo hal milyuun oo ah Sh.So ah, taasoo ah lacag ardaydu jeebkooda kasoo gooyeen uguna talo galeen inay uga qeyb qaataan taakulaynta dhaqaale ee garoonka Cawaale.

Guddoomiyaha dhalinyarada gobolka Mudug, Jacfar Yuusuf Cabdalla, ayaa uga mahad celiyay Maamulka, Macalimiinta iyo Ardayda dugsiga Cumar Samatar dhaqaalahaan, isagoo sheegay ineysan ahayn dhaqaalihi ugu danbeeyay ay kaga qayb qadanayaan Garoonka ayna diyaar u yihiin markasta kaalintooda kaga aadan horumarka Gaalkacyo iyo horumarka Puntland.

Agaasimaha guud ee wasaaradda shaqada, shaqaalaha, dhalinyarada iyo ciyaaraha Puntland, Axmed Cabdalla Tigaana, oo ku sugnaa madasha ayaa dhankiisa ammaan balaaran usoo jeediyay ardayda iskuulka Cumar Samatar iyo maamulkooda, isagoo uga mahad celiyay sida mar walba uga qeyb qaataan arrimaha danta caamka ah.

Dhawaan ayaa la filayaa inuu si rasmi ah u bilowdo dib udhiska garoonka Cawaale, iyadoo haatan gacanta lagu hayo dhaqaale xoogan oo kasoo xarooday dalka gudihiisa iyo dibada. Waxaa kaloo intaas dheer in dowladdana ay bixisay qaaraankii ay uga qeyb qaadanaysay garoonka.

Cabdiweli Mohamed Sheikh.

Puntlandi.com