Xogta saddex qodob oo la isku mari waayay kahor heshiiska Soomaaliya iyo Kenya

[Deeq A.]

Muqdisho (Caasimada Online) – Labada dal ee Soomaaliya iyo Kenya waxay galeen heshiisyo badan tobankii sano ee ugu dambeysay laakiin wax badan kama dhaqan-gelin heshiisyadaas.

Sababta waxaa lagu sheegaa in dhanka Kenyanka aanay daacad ka aheyn balamada ay la galaan madaxda Soomaaliya.

Markale waxaa 6-dii bishaan magaalada Nairobi lagu gaaray saddex heshiis, halkaas oo uu ku sugan yahay himika ra’iisul wasaaraha Soomaaliya Xamza Cabdi Barre.

Heshiiska difaaca iyo siyaasadda, midka waxbarashada iyo arrimaha bulshada, iyo midka ganacsiga ayaa la gaaray. Waa markii saddexaad ee uu qabsoomo barnaamijka iskaashiga labada dal, laakiin dadka arrintaan la socday ayaa kusoo baraarugay in meesha laga saaray saddex is-afgarad oo ay waayahan buuq badan ka taagnayeen.

Saddexdaas oo ay labo dhanka Kenya ka cuslaatay, midna uu ka socon waayay dhanka Soomaaliya.

1. Qaadka

Saddexda heshiis ee isha lagu hayay mid waxa uu ku saabsana maandooriyaha Qaadka.

Kenya waxay rabtay in heshiis rasmi ah loo beddelo habka ay maandooriyahan u geeyaan Soomaaliya, laakiin dhinaca dowladda Soomaaliya aad uguma fir-fircooneyn in ganacsigaasi loo beddelo heshiis heshiis weyn.

Ganacsatada gobolka Qaadka beera ee Kenya ku yaalla ee Miiruu waxay horey u sheegeen inay rajeynayaan in heshiis buuxa oo rasmi ah laga gaaro buuqa iyo isqab-qabsiga qaadka ee soo noq-noqda.

Balse Soomaaliya ayaa la sheegay inay ka cago jiiday. Ka gaabsiga Soomaaliya ee qodobkan keliya lama xiriirto dano qaran ee waxa kale oo jira dano gaar ah oo arrintaan diidaya.

2. Socdaalka

Dhinaca Soomaaliya waxay xiisaynayeen in heshiisyada lagu daro arrinta Visaha oo halkaa lagu qoro in dadka wata baasaboorka Soomaaliga ah inay kamid dadka Kenya ku yimaada “Verify Visa”. Halka baasaboor Kenyaanka watana ay Visa la’an tagi karaan Soomaaliya, laakiin Kenya ayaa midaasi ka cago-jiiday.

Sababta ay Kenya marwalba oo socdaalka laga hadlo iskaga riixdo arrinta Visaha waxay la xiriirta amniga.

3. Diyaaradaha

Wasaaradda gaadiidka iyo duulista Soomaaliya ayaa waday qorshe diyaarado gaar loogu xiraayo safarada Soomaaliya iyo Kenya. Tusaale in laba diyaaradood oo Kenya ah iyo laba diyaaradood oo dhanka Soomaaliya ah in loo xiro guud ahaan shaqada, iyada oo meesha laga saarayo ku dhowaad lix diyaaradood oo kale ayay qorsheynaysay wasaaradda duulista ee Soomaaliya.

Qodobkan ayaa waxaa dagaal badan ka galay diyaaradaha ka shaqeeya Soomaaliya iyo Kenya, waxayna markii dambe kasoo dhamaan weyday dhanka Garyaqaanka Guud ee Kenya.

Ganacsato badan oo Soomaali ah ayaa ku suuq-beeli laheyd haddii la saxiixi lahaa qodobkaas, sidoo kalena waxaa qorshaha ku jirtay in tigidhada qaali laga dhigo, taas oo culeyska ku badin laheyd shacabka.

Waxaa loo arkaa in laga heshiin waayey saddexdii ugu muhiimsaneyd labada dhinac ee Soomaaliya kyo Kenya. Heshiisyada hadda la gaarayna waxaa ugu muhiimsan midka waxbarashada, kaas oo sidoo kale la aaminsan yahay in fulintiisa daacad ka noqon karto dowladda Kenya.

The post Xogta saddex qodob oo la isku mari waayay kahor heshiiska Soomaaliya iyo Kenya appeared first on Caasimada Online.