Israa’iil Oo Iska Diiday Digniinaha Uga Imanaya Reer Galbeedka Ee Ah In Ayna Weerarin IRAN

[Deeq A.]

Kaddib marki uu la kulmay wasiirrada arrimaha dibadda Ingiriiska iyo Jarmalka, ayuu ra’isul wasaaraha Isra’il Benjamin Netanyahu Arbacadi shalay ka shanqariyay, in Israa’iil ay iyadu qaadan doonto go’aannadeeda ku saabsan sida ay isu difaaceyso.

Hadalkaan ayaa kusoo aadaya xilli dalalka reer galbeedka gaar ahaan kuwa xulufada la ah Isra’iil ay ku cadaadinayaan xukumadda Telaviv in ay is xakameyso oo ayna ka jawaabin weerarki ay dhawaan kala kulantay Iran.

Mareykanka Midowga Yurub, iyo dalalka warshadaha ku horumaray ee G-7 ayaa dhammaantood dhawaaqay qorshayaal ay ku saarayaan cuna-qabateyn hor leh. Arrintaasi ayaa loo arkaa mid ay reer Galbeedka ku direen farriin ah in Isra’il ayna ka aar-gudan Iran.

Xafiiska Netanyahu ayaa sheegay, inuu uga mahadceliyay wasiirka arrimaha dibadda Jamralka Annalena Baerbock iyo dhiggeeda Ingiriiska David Cameron taageerada ay u muujiyeen, balse uu u caddeeyay in Israa’iil ay iyadu qaadaneyso go’aannada ay isku difaaceyso.

Source