QM oo malaayiin dollar ku bixineysa fatahaadaha Soomaaliya

[Deeq A.]

Sanduuqa gargaarka Qaramada Midoobay ee Soomaaliya ayaa soo bandhigay 9.26 milyan oo dollar oo loo adeegsan doono in lagu badbaadiyo nolosha ku dhowaad 3oo,ooo oo ruux oo Soomaali ah oo waxyeelo ay horey uga soo gaartay fatahaado ku dhuftay dalka

Lacagtaasi oo qeyb ka ah qorshaha gargaarka deg-deg ah ee QM ee Soomaaliya ayaa la sii marsiin hay’addaha caalamiga ah iyo kuwa aan dowliga aheyn, si ay gargaar u siiyaan dadka ku nool gobalada Banadir, Hiiraan, Jubbadda Hoose, Shabeelaha dhexe iyo Shabeelaha Hoose oo ka mid ah gobollada ugu daran ee ay saameynta xoogan ku yeesheen fatahaadaha ay sameeyeen webiyada Jubba iyo Shabelle.

Dhammaan lacagtaasi oo uu soo uruuriyey sanduuqa gargaarka Qaramada Midoobay ee Soomaaliya ayaa waxaa ururada samafalka ay deeqo ku gaarsiin doonaan dadka aadka u nugul ee  ku waxyeeloobay fatahaadaha ku dhuftay Soomaaliya, sidaasi waxaa yiri xiriiriyaha arrimaha gargaarka Qaramada Midoobay ee Soomaaliya, Adam Abdelmoula.

Sidoo kale waxaa uu sheegay iyada oo uu billowday xilli roobaadka Deyrta loo baahnaan doono lacag kale oo deeq ah oo loogu fulinayo howl-gallada gargaarka bani,aadanimo, si loo sameeyo dib u kabasho ka dhacda dalka oo dhan.

8.18 milyan oo dollar oo ka mid ah lacagtaasi ayaa loo adeegsan doono raashiin gargaar ah, meelo ay dadka ay ka dhigtaan hoy, faya dhowrka, nadaafadda, daryeelka caruurta iyo xad-gudubyada dhinaca jinsiga.

Hal milyan oo dollar oo qayb ka lacagtaasi ayaa sidoo kale loo weecin doonaa dhinacyada caafimaadka, quudinta waxbarashada iyo dhowrista caruurta

Qaramada Midoobay ayaa hore u sheegtay in saddex milyan oo Soomaali ah ay u baahan yihiin gargaar bani’aadanimo oo deg deg ah.

View the full article