Puntland oo ka hortimid hannaanka fiisaha Online-ka ah oo dowladda Soomaaliya hirgelisay

[Deeq A.]

Xukuumadda Puntland ayaa ka hortimid hannaanka fiisaha danabaysan oo dowladda Soomaaliya ku soo rogtay dhammaan dadka ku safraya baasaboorrada shisheeye oo dalka imaanaya.

Wasiirka Warfaafinta Puntland, Maxamuud Caydiid Dirir oo shaaciyay mowqifka Puntland ee ku saabsan arrintan ayaa sheegay in aysan Puntland u hoggaansami doonin hannaankan cusub ee dowladda Soomaaliya ku soo rogtay dadka sita baasaboorrada shisheeye ee imaanaya Soomaaliya.

Wasiir Caydiid wuxuu sheegay in qof kasta oo baasaboor ajnabi ah sita oo imaanaya garoomada Puntland in sidii hore looga qaadayo lacagtii fiisaha, islamarkaana aysan jirin wax isbeddel ah oo ku yimid, waxaana uu xusay in ay heshiis u baahan tahay haddii la rabo in wax laga beddelo arrintaasi.

Wasiirka ayaa ku eedeeyay dowladda Federaalka in ay isbaaro hawada dhigatay si ay u samayso dhaqaale urursi iyo boobka hantida shacabka isagoo caddeeyay in Puntland aysan aqbali doonin in dadka kasoo degaya garoomadeeda laga qaado waxa uu ugu yeeray “lacago baad ah” oo dowladda dhexe dooneyso inay ku ururiso magaca fiiso.

PUNTLAND POST

The post Puntland oo ka hortimid hannaanka fiisaha Online-ka ah oo dowladda Soomaaliya hirgelisay appeared first on Puntland Post.