IGAD oo shaacisay doorka Ismaaciil Cumar Geelle ee arrinta LAASCAANOOD

[Deeq A.]

Laascaanood (Caasimada Online) – Xoghayaha Guud ee Urur Goboleedka IGAD Mudane Workneh Gebeyehu ayaa war cusub ka soo saaray xaaladda kacsan ee weli ka jirta gudaha Laasacaanood, gaar ahaan xiisadda u dhexeysa ciidanka Somaliland iyo dadka deegaanka.

Workneh Gebeyehu ayaa ugu horreyn shaaca ka qaaday in IGAD ay ka walaacsan tahay xaaladaha murugan ee laga soo warinayo magaaladaas oo ku taalla waqooyiga Soomaaliya.

Xoghayaha ayaa soo hadal qaaday door nabadeed oo uu sheegay in madaxweynaha dalka Jabuuti, Ismaaciil Cumar Geelle uu ku leeyahay xiisadda taagan, si xal waara loogu helo.

Waxa kale oo uu sheegay inay ku boggaadinayaan madaxweyne Geelle dhex-dhexaadinta uu ka dhex wado labada dbhinac.

“IGAD waxay bogaadinaysa dadaalada dhexdhexaadineed ee ilaa hada uu sameeyay madaxweynaha Jabuuti Ismaaciil Cumar Geelle, waxayna ku dhiirigalinaysa in uu sii wado dhexdhexaadinta” ayuu yiri Workneh Gebeyehu.

Sidoo kale wuxuu tilmaamay in loo baahan yahay in fiiro gaar ah loo yeesho arrinta ka jirta magaalada Laascaanod, si xal loogu helo xasaradda ka taagan magaaladaasi.

Ugu dambeyn wuxuu ka hadlay khasaaraha ka dhashay iska hor imaadyadii hubeysanaa ee ka dhacay gudaha magaalada, maadaama dad shacab ahaa lagu dilay dagaalladii dhacay.

“Waxaanu soo qaadanayna xiisada dhawaanahan ka jirtay Laascaanood, taasi oo walaac abuurtay, marka la eego khasaaraha nafeed ee ka dhashay, xaalada Somaliland waxay u baahan tahay in fiiro gaar ah oo ku aadan heshiis nabadeed laga yeesho” ayuu yiri.

Magaalada Laascaanood ayaa marti-gelisay maalmo rabshado ah, taas oo keentay in ciidamada Somaliland ay isaga baxaan gudaha magaaladaasi, waxayna qalalaasahaasi ka dhasheen dilal 15-kii sano ee lasoo dhaafay magaalada loogu geysanayay haldoorka Sool.

Si kastaba, waxaana haatan laga war dhowrayaa shirweynaha ka socda Laascaanood, kaas oo ay leeyihiin waxgaradka gobollada Sool, Sanaag iyo Ceyn oo la’isku yiraahdo (SSC), wuxuuna shirkooda qaatay maalmo badan, kaas oo la filayo inay go’aanno kasoo saaraan.

The post IGAD oo shaacisay doorka Ismaaciil Cumar Geelle ee arrinta LAASCAANOOD appeared first on Caasimada Online.