Somaliland oo ka mid noqonaysa dalal ay dawlada Kiiniya ay safaarado ka furanayso

[Deeq A.]

Dowladda Kenya ayaa lagu wadaa inay dhawaan furtaan 7 xafiisyo cusub ee ergada diplomaasiyadeed , taasi oo qeyb ka ah Dib-u-habayntii u dambaysay ee dowladda uu hoggaamiyo Madaxweyne William Ruto.

Qoraal fulin Amar (Executive Order) oo tirsigeedu yahay No.1 ee sanadka 2023-ka ayuu soo saaray Madaxweyne Ruto, taasi oo lagu yegleelayo 7 Ergooyin cusub oo Diplomaasi oo laga furi doono caasimaddaha dalalka Djibouti, Switzerland, Indonesia iyo magaallooyinka Caruusha ee Tanzania, Goma ee dalka Koongada Dimuqraadiga iyo Hargeysa (Somaliland).

Sida laga soo xigtay xogta wasaaradda Arrimaha dibedda ee dalka Kenya waxaa lagu xusay in xafiisyada Ergooyinka cusub ee Djibouti, Indonesia iyo Somaliland loo adkeeyey inay noqon doonaan dalalka khaaska ah.

Xafiisyada cusub ee hawlgallada ergooyinka diplomasiyadeed ee Kenya ku leeyihiin dalalka dibedda waxay tirada guud ka dhigaysaa 60 Xafiis, halka ay markii hore ka ahaayeen 60 Xafiis.

Xafiisyada ergada diplomaasiyadeed waxay kordhin doonaan Wakiiladda Kenya u jooga dalalka Shisheeyaha, xilli ay dowladda Madaxweyne William Ruto doonayso in la labanlaabto xiriirada horumarinta ganacsiga, dhaqaalaha iyo dhaqanka ee lala leeyahay dalalka kale.

Somaliland ayaa xafiis shaqaynaaya ku leh dalkaasi Kiiniya, waxana jira shaqaale aad u tiro badan oo ka shaqaysta Somaliland kuwaasi oo isugu jira macalimiin, dhakhaatiir, shaqaalaha dhismaha iyo kuwo qabta adeegyo kale oo fara badan, waxana dhawaan bilaabmay in dalka Kiiniya laga soo dhoifiyo oo Somaliland la keeno Jaadka ka yimaada dalka Kiiniya

Qaran News