Turkiga Oo Xidhay Nin Soomaali Ah Oo Tiktok Soo Dhigay Muuqaal Cadho Ka Abuuray Dalkaas

[Deeq A.]

Ciidamada Ammaanka dalka Turkiga ayaa xasbiga dhigay muwaadin Soomaaliyeed oo bartiisa TikTok ku baahiyay muuqaalka isaga oo jeex-jeexaya lacagta waddankaas, taas oo ay dowladda Turkiga aad uga cadhootay.

Muwaadinka Soomaaliga ah oo heysta dhalashada dalka Finland ayaa muuqaalka uu iska soo duubay wuxuu si weyn ugu baahay baraha bulshada, gaar ahaan TikTok, waxaana tallaabada uu qaado ay baqdin ku abuurtay dadka kale ee Soomaalida oo ka cabsi qaba in uu saameyn ku yeesho noloshooda.

Muuqaalka ayaa sidoo kale ka cadheysiiyey shacabka Turkiga oo falka uu ninkaas sameeyey u arkay xushmad darro lagula kacay dalkood iyo lacagtooda.

Saraakiil ka tirsan laamaha amniga dalka Turkiga ayaa sheegay in ninkaas ay baadhitaan ku hayaan maskax ahaan, waxaana macquul ah in dhawaan maxkamad la soo taago, islamarkaana lagu rido xukun xabsi ah.

Toddobaadyo ka hor ayay ahayd markii haweeney Soomaali ah oo ku sugan dalka Turkiga ay difaacday haweeney Suuriyaan ah oo loo xidhay qaraxii ka dhacay magaalada Istanbul oo ay ku dhinteen lixda qof, taasi oo sidoo kale cadho ka dhalisay dalkaas.

Warbaahinta adduunka ayaa soo qaadatay muuqal ay haweeneyda ku faafisay baraha bulshada, iyadoo sheegaysa in haweeneyda la xidhay aanay iyadu falka ku lug lahayn.

Source