DF Soomaaliya oo shaacisay inay cadaadis kala kulantay IGAD

[Deeq A.]

Wasiirka arrimaha dibadda iyo iskaashiga caalamiga ah ee xukuumadda federaalka ah ee Somalia, Maxamed Cabdirisaaq Maxamuud oo ka mid ahaa wafdiga Madaxweynaha ee  Jabuuti ayaa sheegay in IGAD ay cadaadis  ku saareyso inay xaliso xiisada Kenya.

Maxamed Cabdirisaaq ayaa shaaca ka qaaday in IGAD ay Soomaaliya cadaadis ku saartay sidii xiisada kala dhaxeysa Kenya loogu xalin lahaa golahaas, iyada oo la dejinayo xiisada.

“Madaxda IGAD waxay aad cadaadis ugu saareen Soomaaliya in arrinta Kenya uu noqdo mid lagu xalliyo IGAD dhexdeeda, oo uu noqdo mid laga gaaro wada-hadal iyo is afgarad oo halkaas arrimaheena ku xallino, tallaabada ugu horeysa ay tahay in xaalada la dejiyo iyo xiisadda, Soomaaliya taas waa ogolaatay, laakiin waxaan ku xirnay shuruud ah in loo saaro guddi arrimaha ay Soomaaliya ka ashtakooneysay,” ayuu yiri wasiirku.

Sidoo kale wuxuu xusay in madaxda IGAD ay ka ogolaadeen in la dejiyo xiisada oo xiligan mareysa meel sarre, tan iyo markii ay dowladda Soomaaliya ku dhawaaqday inay xiriirkii diblomaasiyadeed u jartay, kadib markii ay ku eedeysay faro-gelin gudaha ah.

Ugu dambeyn wuxuu hoosta ka xariiqay inay dalbadeen in guddi loo saaro xiisada ka soo cusboonaneysa xadka Kenya, oo uu sheegay in xukuumadda Nairobi ay halkaas ku abaabushay maleeshiyaad jabhado ah oo hubeysan, wuxuuna shaaciyey in IGAD ogolaatay in loo diro guddi xaqiiqo raadin ah.

Hadalkan ayaa imanaya xili maalintii shalay aheyd magaalada Jabuuti ku kulmeen madaxda labada dal, kaasi oo ay goob joog ka ahaayeen madaxweynaha Jabuuti iyo Ra’iisal wasaaraha Itoobiya, si xal looga gaaro xiisada u dhexeysa labada dowladood.

View the full article