Barakac ka bilowday Beled-Xaawo iyo xiisad dagaal oo ka tagan xuduudda

[Deeq A.]

Beled-Xaawo (Caasimada Online) – Wararka ka imanaya degmada Beled-Xaawo ee gobolka Gedo ayaa sheegaya inuu ka billowday barakac ay sameynayaan qaar ka mid ah Shacabka ku nool degmadaas, xilli ay xiisad dagaal ka taagan tahay magaalada.

Qaar ka mid ah shacabka oo la hadlay Caasimada Online ayaa sheegay inay ka cabsi qabaan inay dushooda ku dagaalamaan ciidamada dowladda Soomaaliya ay geysay gobolka Gedo iyo ciidamada Wasiir Janan iyo kuwo kale oo ku sugan dhanka xuduudda ee Kenya.

Xaafada degmada Beled-Xaawo ee laga barakacay ayaa waxaa kamid ah xaafadaha Qansax Barwaqo, Xashawe iyo Dhabad, kuwaas oo la sheegay in dadka badi ay ka barakacayaan

Dad ku sugan degmada Beled-Xaawo ayaa sheegay in Gudaha degmada iyo dhinaca magaalada Mandheera ee Kenya lag dareemayo abaabul dagaal, gaar ahaan halka ay ku sugan yihiin ciidamadii horay looga saaray Beled-Xaawo ee Jubaland.

Xiisada dagaal iyo barakaca ka billowday degmada Beled-Xaawo ee Gedo ayaa imaneysa ayada oo dowldda federaalka Soomaaliya ay maanta sheegtay inay “si dhaw ula socoto abaabulka militari ee ay dowladda Kenya maalmahan ka waddo aagga Mandera iyada oo hubeynaysa jabhad ay si sharci darro ah dalkeeda ugu martigelisay si xasillooni darro looga abuuro gudaha Soomaaliya.”

Dowladda Federaalka Soomaaliya ayaa intaas ku dartay inay ogaatay in ciidamada Kenya “ay hub iyo maleeshiyaad kusoo daad gureysay magaalada Mandera si duullaan loogu soo qaado” magaalada Beled Xaawo iyo saldhigyada Ciidanka Xoogga Dalka Soomaaliyeed ee aaggaas ku yaalla.

Jubaland iyo mucaaradka Soomaaliya ayaa horey ugu eedeeyey madaxweyne Farmaajo inuu abuurayo xiisad aan lagama maarmeyn ahayn, si uu dagaalka Kenya uga dhigto olole doorasho, ayaga oo is-weydiiyey sababta uusan Kenya ugu dhiidhin afar sano oo uu kursiga fadhiyey ee hadda un uu ugu soo baraarugay.

The post Barakac ka bilowday Beled-Xaawo iyo xiisad dagaal oo ka tagan xuduudda first appeared on Caasimada Online.