Israa’iil Oo Markii Labaad Toddobaad Gudihii Duqeysay Magaalada Ee Dalka Suuriya

[Deeq A.]

(SLT-Dimishiq)-Dowladda Suuriya ayaa maanta oo arbaca ah sheegtay in Millatariga Israa’iil ay duqeeyeen koonfurta magaalada Dimishiq, duqeyntan oo noqoneysa tii labaad oo toddobaad gudihiisa ah oo ay ciidammada Israa’iil la beegsadaan nawaaxiga caasimada Suuriya.

Yoolka duqeyntan ayaa la sheegay inuu ahaa saldhigyada ciidammada Suuriya iyo kuwa Iran ay ku leeyihiin nawaaxiga dhulka buuraleyda ah ee Golan, saldhigayadaasi oo ay yaalaan gantaalada lidka diyaaradaha.

Millatariga Suuriya ayaa sheegay in ayna wax khasaaro ah geysan duqeyntan, halka Israa’iil ay ka gaabsatay inay ka hadasho weerarkan.

Israa’iil ayaa bilihii lasoo dhaafay dardargelisay weerarada ay ku qaadeyso gudaha dalka Suuriya, iyadoo ka cabsi qabta ciidammada Iran ee gacanta siiya Xukuumadda Bashar Al Assad.

Maamulka Maraykanka ee Donald Trump oo doorashada lagaga guuleystay ayaa la rumeysan yahay inay hore heshiis qarsoodi ah kula jireen Israa’iil inay weeraro noocaan ah ku qaado Suuriya, tani oo qeyb ka ah cadaadiska Trump doonayey inuu saaro dowlada Iran.

Source