Mahad Salaad oo Rooble ka dalbaday inuu iska bari yeelo odayaal ‘gef gaystay’

[Deeq A.]

Muqdisho (Caasimada Online) – Xildhibaan Mahad Maxamed Salaad ayaa qoraal uu soo dhigay bartiisa Facebook-ga waxa uu ku dhaleeceeyey Ra’iisul wasaare Rooble, isagoo ku eedeynaya hadal ay dhawaan jeediyeen odayaal u muuqday inay taageero u yihiin xukuumadiisa.

Mahad Salaad ayaa sheegay in odayaashaas laga soo abaabulay magaalooyinka Gaalkacyo iyo Muqdisho, isagoo sheegay in hadalkoodii aan laga faa’iideyn wax aan ceeb iyo foolxumo aheyn, sida uu hadalka u dhigay.

“Odoyaasha Gaalkacyo iyo Xamar laga abaabulay ee hadalada xanafta iyo dhega-hadalka ah warbaahinta la soo fariistay ceeb iyo foolxumo in ay soo jiido mooyee faa’iido lagu gaari maayo. Dalkaan Madaxweyne iyo Ra’iisul Wasaare waa soo lahaan jiray sidaana qaraabadoodu uma qabyaalad hadli jirin,” ayuu yiri.

Mahad Salaad ayaa sidoo kale ra’iisul wasaaraha ugu baaqay in hadii uu wax ka ogaa hadalkii ay jeediyeen odayaashaas uu raali gelin ka bixiyo, hadii kalena uu iska beri-yeelo.

“Mudane Ra’iisul Wasaare hadii ogaalkaa arintaan lagu sameeyay waxaan codsanayaa dadka loo gafay in aad raali gelin siiso. Hadii aadan waxaba ka ogeyna sharaftaada ayaa meel looga dhacay ee fadlan iska fogeey,” ayuu qoraalkiisa ku yiri.

Hoos ka Daawo hadalka uu dhibsaday Mahad Salaad

The post Mahad Salaad oo Rooble ka dalbaday inuu iska bari yeelo odayaal 'gef gaystay' first appeared on Caasimada Online.