Saraakiil sar sare oo shaqo loo ceeriyey wiil SOOMAALI ah dartiis & sababta ka dambeysa

[Deeq A.]

London (Caasimada Online) – Jaamacadda Manchester ee UK ayaa shaqo fariisin ku sameysay saraakiil cunsuriyeysay arday Soomaali ah oo wax ka barta jaamacaddaasi.

Zac Aadan oo 19 jir ah ayaa cunsuriyeen iyo xad-gudub kala kulmay saraakiisha shaqada laga eryey, iyaga oo marka hore weydiiyey in uu tusiyo aqoonsigiisa, waxayna geeyeen gidaarka hoolka Fallowfield, kadibna waxa ay ka qaadeen sawirro ku faafay baraha bulshada.

Saraakiisha ayaa waxa ay u sheegeen Aadan in uu u eg yahay nin ka ganacsada Daroogada, falkaasi oo uu aad uga carooday wiilka Soomaaliga ah oo dhiganayey sanadkiisa 1-aad ee jaamacadda.

Qoraal ka soo baxay jaamacadda ayaa sidoo kale sheegay in la baarayo dhacdadaasi iyo ujeedka gaarka ah ee laga lahaa.

Sidoo kale waxa ay jaamacadda Manchester intaasi u dartay inay ka welwelsan tahay sawirka ardaygaan ee lagu faafiyey baraha bulshada ee Internet-ka.

Dhankiisa Zac Aadan oo la hadlay warbaahinta ayaa sheegay in marka uu tusiyey kaarkiisa ay ula dhaqmeen saraakiishu si aan wanaagsaneyn oo saameyn ku yeelatay.

“Waxa aan gacanta ku haystay kaarkayga aqoonsiga, waxa ay isku dayeen in ay iga dhacaan, waxaa xigay in darbiga la igu dhejiyo, qofkasta oo Dhismaha Jaamacadda ku jiray waxaa loo sheegay wixii dhacay iyo in aan u hoggaansamay dalabka ilaalada,” ayuu yiri.

Ugu dambeyn jaamacadda Manchester ayaa raalli-gelin ka bixisay falkan, iyada oo ka digtay in midab kala sooca uu caadi ka noqdo goobaha ay isugu tagaan ardayda.

The post Saraakiil sar sare oo shaqo loo ceeriyey wiil SOOMAALI ah dartiis & sababta ka dambeysa first appeared on Caasimada Online.