Nabadoon Yaasiin oo laga dalbaday in uu caddayn u keeno hadii Kiiskii Hodon Shanlayste Laaluush lagu qaatay

[Deeq A.]

Guddoomiyaha Maxkamadda Derejada Kowaad ee Gobolka Nugaal, Shiikh Cabdinuur Jaamac Xuseen, oo hadal kooban siiyay Warbaahinta, ayaa dalbaday in Caddayn loo keeno eedaymo uu sheegay in loo jeediyay isaga iyo xubno kale oo ka tirsan Garsoorka Puntland.

Shiikh Cabdinuur, ayaa ka dalbaday Nabaddoon Yaasiin Cabdisamad in uu caddayn u keeno eedaymo la xiriira Laaluush-qaadasho, oo uu ku eedeeyay Garsoorka Puntland, gaar ahaanna Maxkamadda Derejada kowaad ee Gobolka Nugaal.

Guddoomiye Cabdinuur,  ayaa ballan-qaaday in uu sida ugu dhakhsaha badan isu casili doono, haddii lagu caddeeyo in uu Laaluush ku qaato Shaqadiisa Garsoorka, gaar ahaanna Kiiskii u dambeeyay ee marxuumad Hodon Shanlayste, oo ay cabasho ka keeneen Qoyskeeda.

“Haddii Ninkaasi Arrinta uu sheegay igu soo caddaysto, oo warkaasi war jira uu noqdo, intaas waxaan ogaysiinayaa istiqaalada in aan geynayo, Kiisaska aan ku jirana meesha ay joogaan kaga harayo” ayuu yiri Shiikh Cabdinuur

Guddoomiyuhu wuxu sidoo kale ugu baaqay Nabaddoon Yaasiin Cabdisamad, in uu cafis weydiisto Garsoorka Puntland, haddii uusan caddayn u hayn in ay Laaluush ku qaateen Shaqada loo igmaday, si gaar ahna kiiskii u dambeeyay ee Hodon Shanlayste.

PUNTLAND POST

The post Nabadoon Yaasiin oo laga dalbaday in uu caddayn u keeno hadii Kiiskii Hodon Shanlayste Laaluush lagu qaatay appeared first on Puntland Post.