Dibad-baxyo dagaal sababay oo maanta ka dhacay gobolka Gedo

[Deeq A.]

Wararka laga helayo gobolka Gedo ayaa sheegaya in maanta dibad-baxyo ballaaran oo laga soo horjeedo ciidamada Kenya ay ka dhaceen degmooyinka gobolkaasi.

Dibad-baxyada oo ay dhigeen boqolaal shacab ah oo careysan ayaa ka dhacay dhammaan degmooyinka gobolka Gedo oo dhaca koonfuta Soomaaliya.

Dadka dhigayey dibad-baxyada ayaa ku qeylinayey erayo ka dhan ah ciidamada Kenya, oo dhowaan tacadiyo ka geystay degmada Ceelwaaq.

Sidoo kale waxa ay dalbanayeen dibad-baxayaashu in gabi ahaan ciidamadaasi laga saaro dalka oo dhan.

Dhanka kale waxaa dibad-baxa ka dhacay Beled-Xaawo uu sababay iska hor imaad kooban oo dhex-maray ciidamada Soomaaliya iyo kuwa Kenya.

Dagaalka ayaa yimid, kadib markii ciidamada Kenya ee jooga xadka ay rasaas ku fureen dibad-baxayaal ka tallaabaday degmada Beled-Xaawo, waxaana xigtay rasaas ay iyaguna dhankooda ku wajaabeen ciidamada Soomaaliya ee ku sugan halkaasi.

Nabadoon Idiris Cabdiraxmaan oo ka mid odayaasha dhaqanka Beled-Xaawo ayaa Shabelle uga warrramay, sida ay wax u dhaceen iyo dibad-baxyada gobolka Gedo.

Xaaladda ayaa hadda dagan, balse wuxuu isku dhacan ku soo aadayaa iyada oo ay haatan ka sii dareyso xiisada ka dhalatay tacadiyada ay ciidamada Kenya ka geysteen degmada Ceelwaaq, ka gadaal markii ay dil iyo dhaawac ugu geysteen dad rayid ah.

View the full article