Aqalka Sare oo gaaraya go’aan saxafiyiinta ka dhan ah, cabsi Shabaab darteed

[Deeq A.]

Muqdisho (Caasimada Online) – Guddiga arrimaha bulshada, gaar ahaan qeybta warfaafinta ee Golaha Aqalka Sare ayaa diyaariyay qorshe ka dhan ah warbaahinta, kaas oo dhaqan geli doona marka uu furmayo Kalfdhiga soo socda, sida ay xog ku heshay Caasimada Online.

Guddigaan ayaa taliska xarunta Aqalka Sare ku wargeliyay in marka uu furmayo Kalfadhiga soo socda oo ah kan ugu dambeeya uusan imaan karin xarunta baarlamaanka, weriye aan warqad ruqso ah kawadan wasaaradda warfaafinta Soomaaliya, taas oo soo martay hubin amni oo ah CID.

Sababta arintaan ayey ku sheegeen in ay oga gol leeyihiin saddex arin kala ah.

1) – Dhaqan gelinta xeerka saxaafadda oo la filayo in uu saxiixo madaxweynaha Soomaaliya.

2) – Hubinta amaanka, Guddigu waxay sheegeen iyadoo laga duulayo dhanka ammaanka ay muhiim tahay in la hubiyo saxafiyiinta maadaama ay Al-Shabaab ku milmeen qeybaha bulshada, islamarkaana aysan ku soo dhax gamban Al-Shabaab weriye iska dhigaya.

3) – Iyo xakameenta warar aan sax aheyn oo ay sheegeen in laga tabiyay fadhiyada Aqalka sare, taas oo haddii ay dhacdo toos looga dacwoon doono weriyihii warkaas baahiyay.

Caasimada Online waxay xogtaan ka heshay ilo wareedyo lagu kalsoon yahay oo ka tirsan taliska ciidanka ee xarunta aqalka sare iyo hay’adaha ammaanka.