Fiqi oo shaaciyey sir xasaasi ah oo ku saabsan heshiiska Somaliland iyo Israa’iil

[Deeq A.]

Muqdisho (Caasimada Online) — Wasiirka Gaashaandhigga Soomaaliya ayaa ku eedeeyay maamulka Somaliland inay oggolaadeen qaabilidda Falastiiniyiinta laga soo barakicinayo Gaza, si ay beddelkeeda aqoonsi uga helaan Israa’iil, isaga oo sheegay in heshiiska Jimcihii la saxiixay uu xambaarsan yahay qodob sir ah oo dhigaya “barakicin lagu beddesho dowladnimo.”

Wareysi uu siiyay Al-Ghad TV, ayuu Axmed Macallin Fiqi wuxuu heshiiska ku tilmaamay “xadgudub qaawan” oo ka dhan ah qarannimada Soomaaliya, kaas oo aan kaliya halis ku ahayn Geeska Afrika balse sidoo kale khatar ku ah “amniga guud ee Carabta.”

“Kooxda gooni-goosadku waxay dalbadeen in Israa’iil aqoonsato Somaliland, iyaguna ay beddelkeeda qaabilaan dadka laga soo barakiciyay Marinka Gaza,” ayuu yiri Fiqi, isagoo xusay in xogta sirdoonku muujinayso in heshiis is-dhaafsi ah la gaaray si loo qaabilo qaxootiga dagaalka.

Fiqi wuxuu waxba kama jiraan ku tilmaamay guusha diblomaasiyadeed ee Hargeysa looga dabaal-degay, taas oo habeenkii Jimcaha damaashaad lagu soo dhaweeyay. Wuxuu sheegay inaysan wax qiimo sharci ah ku lahayn indhaha caalamka.

“Aqoonsiga Israa’iil ee qeyb ka mid ah dhulka Soomaaliya waa sheegasho been ah, waxba kama jiraan, mana laha raad sharci ama mid siyaasadeed,” ayuu yiri Fiqi. “Waxba kama beddelayso xaqiiqda dhulka taalla.”

Wuxuu ku dooday in Israa’iil, maadaama ay tahay “awood gumaysi,” aysan xaq u lahayn inay cid kale siiso qarannimo. Hase yeeshee, wuxuu ka digay in heshiiskani yahay tallaabo khatar ah, isagoo Hargeysa ku eedeeyay inay dhulka Soomaaliyeed u iibgeysay raadinta aqoonsi shisheeye.

Eedeynta ah in Hargeysa ay aqbashay qaabilidda Falastiiniyiinta ayaa soo noolaysay mid ka mid ah hadal-hayntii ugu xasaasisanayd ee la xiriirtay qorshayaasha Israa’iil ee dagaalka Gaza kadib. Tan iyo billowgii dagaalka, garabyo ka tirsan dowladda Israa’iil ayaa u ololeynayay “hijrada ikhtiyaariga ah” ee Falastiiniyiinta loogu rarayo dalal saddexaad.

Saraakiisha sirdoonka Israa’iil ayaa la wariyay inay wadahadallo hoose la yeesheen dalal Afrikaan ah sannadihii 2024 iyo 2025—oo ay ku jiraan Congo, Rwanda, iyo Chad—si ay u ogaadaan in dalalkaas diyaar u yihiin qaabilidda qaxootiga iyagoo dhaafsanaya gargaar.

Halka inta badan dalalkaas ay si cad u diideen dalabyadaas kadib caro diblomaasiyadeed, gobolka Somaliland ayaa u muuqda mid ka duwan. Iyadoo ay haysato baahi weyn oo aqoonsi caalami ah kadib 34 sano oo go’doon ah, Somaliland waxay muujisay inay diyaar u tahay jebinta xayndaabka siyaasadeed ee gobolka si ay u hesho dowladnimada ka maqan tan iyo 1991-kii.

Inkastoo mas’uuliyiinta Somaliland ay horay u beeniyeen heshiis noocan ah, haddana warbaahinta Israa’iil ayaa baahisay in wakiillada Somaliland ay muujiyeen inaysan dhib u arkin qaabilidda qaxooti badan haddii taasi ay waddo u noqonayso aqoonsi ay ka helaan Washington ama Tel Aviv.

The post Fiqi oo shaaciyey sir xasaasi ah oo ku saabsan heshiiska Somaliland iyo Israa’iil appeared first on Caasimada Online.