Dalal waa wayn oo kusoo biiray diidmada aqoonsiga Israa’iil ee Somailand

[Deeq A.]

Dooxa (Caasimda Online) – Dalal waa wayn iyo ururrada caalamiga ah ee kasoo horjeeda go’aanka ay Israel ku aqoontay Somaliland ayaa sii kordhiyay iyaga oo si isku mid ah u muujiyay diidmo adag oo ka dhan ah Israel, waxayna dhinaca kale taageero u muujiyeen madax bannaanida, midnimada iyo wadajirka dhuleed ee Jamhuuriyadda Federaalka Soomaaliya.

Dowladda Qatar oo bayaan soo saartay ayaa si adag u muujisay diidmadeeda ku aaddan isku day aqoonsi oo u dhexeeya maamulada gumeysiga Israel iyo maamulka Somaliland. Qatar waxay carrabka ku adkaysay in tallaabadani tahay mid khatar ah oo abuuraysa tusaale xun, isla markaana ah ficil hal-dhinac ah oo si cad uga hor imanaya mabaadi’da sharciga caalamiga ah, kuna xadgudbaya madax-bannaanida Soomaaliya.

Sidoo kale, Pakistan ayaa dhankeeda si cad uga soo horjeesatay aqoonsiga Israel ee Somaliland,waxayna arrintan ku tilmaantay tallaabo sharci-darro ah oo khatar ku ah nabadda iyo xasiloonida Soomaaliya iyo guud ahaan gobolka.

Boqortooyada Sacuudiga ayaa iyana caddeysay garab-istaagga Jamhuuriyadda Federaalka ah ee Soomaaliya, iyadoo aqoonsiga Israel ku tilmaamtay tallaabo sharci-darro ah oo ka hor imaaneysa xeerarka caalamiga ah.

Jamhuuriyadda Ciraaq, oo hadda guddoomiyaha Jaamacadda Carabta, ayaa dhankeeda sheegtay in tallaabadan ay xadgudub ku tahay madaxbannaanida Soomaaliya, isla markaana ay khatar ku tahay amniga iyo xasilloonida Geeska Afrika.

Dhankeeda Jamhuuriyadda Yemen ayaa si cad u diidday tallaabo kasta oo wax u dhimaysa midnimada Qaranka Soomaaliyeed, gaar ahaan xiriir ama aqoonsi u dhexeeya Israel iyo maamulka Somaliland.

Dowladda Kuwait ayaa mar kale caddeysay taageerada buuxda ee ay u hayso madaxbannaanida, midnimada iyo wadajirka dhuleed ee Soomaaliya, iyadoo si adag u diidday tallaabo kasta oo hal-dhinac ah oo lagu doonayo in lagu aqoonsado gobol ka mid ah dhulka Soomaaliya. Kuwait waxay arrintaas ku tilmaantay mid ka hor imaneysa sharciga caalamiga ah, isla markaana adkaysay garab-istaagga ay la taagan tahay dowladda iyo hay’adaha sharciga ah ee Soomaaliya.

Boqortooyada Urdun iyaduna waxa ay xaqiijisay taageeradeeda buuxda ee midnimada iyo amniga Soomaaliya, iyadoo aqoonsiga Israa’iil ku tilmaantay mid ka soo horjeeda Axdiga Qaramada Midoobay.

Jaamacadda Carabta iyo Ururka Iskaashiga Islaamka (OIC) ayaa horay iyaguna si wadajir ah u cambaareeyay tallaabada Israa’iil, iyagoo ku tilmaamay faragelin aan la aqbali karin oo ka dhan ah sharciga caalamiga ah, waxayna ku baaqeen in la ixtiraamo madaxbannaanida iyo midnimada dhuleed ee Soomaaliya, lana ilaaliyo amniga iyo xasilloonida gobolka.

The post Dalal waa wayn oo kusoo biiray diidmada aqoonsiga Israa’iil ee Somailand appeared first on Caasimada Online.