Ted Cruz oo Aqalka Sare wax ka weydiiyay la shaqeyn Mareykanku la yeesho Somaliland

[Deeq A.]

Senator Ted Cruz ayaa jamhuuriyadda Somaliland ku soo qaaday dhageysiga Senate-ka ee amniga badda Afrika, isaga oo su’aal u jeediyay Wasaaradda Arrimaha Dibedda. Wuxuu waydiiyay sida Maraykanku u ballaadhin karo iskaashiga Somaliland, gaar ahaan dhanka amniga badda iyo fulinta sharciga, si loola tacaalo khataraha ka jira Geeska Afrika.

Su’aashu waxay si toos ah u taabanaysay in Somaliland lagu daro qorshayaasha Maraykanka ee amniga badda, maadaama ay ku taallo marin istaraatiiji ah oo muhiim u ah badaha gobolka.

Ku-xigeenka Kaaliyaha Xoghayaha ee Hay’adda Maandooriyaha Caalamiga ah iyo Fulinta Sharciga, Maggie Nardi, ayaa ka jawaabtay iyadoo sheegtay in INL aysan haatan wax barnaamijyo firfircoon ka wadin Somaliland, islamarkaana diiraddoodu tahay amniga badda guud ahaan.

Waxay tilmaantay in iskaashigooda hadda uu ka jiro Jabuuti, halka barnaamijyadii Soomaaliya ay dhammaadeen. Nardi waxay intaas ku dartay in wixii iskaashi mustaqbal ah uu u baahan doono qiimayn ku saleysan baahiyaha jira iyo in arrinta laga la tashado Xafiiska Arrimaha Afrika ee State Department oo go’aaminaya mudnaanta ay u arkaan Somaliland.

Jawaabteeda ayaa muujisay in fursado iskaashi oo cusub la tixgelin karo, balse ay ku xiran tahay qiimayn iyo go’aan ka soo baxa waaxaha gudaha ee Wasaaradda Arrimaha Dibedda.

Bbcsomali

Qaran News