Taliska Booliska Soomaaliya oo warbixin ka soo saaray dagaalkii maanta ka dhacay Isgoyska Tarabuunka magaalada Muqdisho

[Deeq A.]

Warsaxaafadeed ka soo baxay Taliska Ciidanka Booliska dowladda Federaalka Soomaaliya ayuu kaga warbixiyay dagaalkii maanta ka dhacay Isgoyska Tarabuunka Xaafadda Horseed ee degmada Hodon (Gobolka Banaadir), kaasi oo sababay khasaare dhimasho, dhaawac iyo burbur hantiyeed.

“Ciidamada Amniga ee Caasimadda Muqdisho ayaa saaka aroortii hore hawlgal isugu jira xaqiijinta amniga iyo la-dagaallanka hubka sharci-darrada ah ka fulinayay xaafadda Tarabuunka ee degmada Hodan. Intii uu hawlgalka socday, waxaa iska hor imaad hubaysan kala horyimid koox maleeshiyaad ah.”

“Falkan, oo ahaa mid khilaafsan nidaamka iyo xeerarka amniga ee caasimadda, ayaa sababay waxyeelo isugu jirta dhimasho iyo dhaawac oo soo gaaray dad shacab ah oo ku sugnaa meel u dhow goobta, xubno ka tirsan Ciidamada Amniga, iyo qaar ka mid ah maleeshiyaadkii hubaysnaa” ayuu Warsaxaafadeedkiisa ku sheegay Taliska Ciidanka Booliska Soomaaliya.

Ciidanka Booliska ayaa sheegay in ugu danbayn Ciidamada Amniga ku guulaysteen xasilinta goobta, kana saareen maleeshiyaadkii hubaysnaa, waxaana intaasi raaciyeen in ay aad uga xun yihiin falalkii dhacay, islamarkaana digniin adag u dirayaan cid kasta oo ku hawlan ama taageerta falalka amniga lidka ku ah, in ay si degdeg ah uga waantoowdo arrintaasi.

PUNTLAND POST

The post Taliska Booliska Soomaaliya oo warbixin ka soo saaray dagaalkii maanta ka dhacay Isgoyska Tarabuunka magaalada Muqdisho appeared first on Puntland Post.