Puntland: Maraykanka oo xaqiijiyay Hawlgalkii lagu qabtay Madaxii Maaliyadda Daacish Cabdiweli Walalac

[Deeq A.]

Dowladda Maraykanka oo maanta bayaan kooban soo saartay ayaa xaqiijisay hawlgalkii ay wadajirka u fuliyeen ciidamada Puntland iyo kuwa Maraykanka ee lagu qabtay Madaxii Maaliyadda Argagixisada Daacish.

Bayaan ka soo baxay Taliska Ciidamada Maraykanka ee AFRICOM ayuu ku xaqiijiyay hawlgalkaasi wadajirka ah oo sida Puntland shaacisay lagu qabtay Madaxii Maaliyadda Argagixisada Daacish ahaana wakiilka kooxda u qaabilsan Ajaanibta oo magaciisu yahay, Abdiweli Mohamed Aw Yusuf (Abdiweli Walalac).

Taliska AFRICOM oo warkan soo saaray ayaa sheegay in aysan sii dayn doonin Faahfaahin gaar ah oo ku saabsan Hawlgalkii shalay, si loo xaqiijiyo ammaanka xogta hawlgallada, balse wuxu sheegay in ay sii wadayaan tallaabooyinka lagu wiiqayo awoodda argagixisada Daacish, si looga hortago in ay fuliyaan weerarro ka dhan ah danaha Maraykanka iyo muwaadiniintiisa ku sugan dibadda.

Warkan ka soo baxay Maraykanka ayaa imaanaya, maalin kaddib markii Puntland shaacisay in hawlgal wadajir ah, oo ay Mareykanka la kaashadeen ku qabteen Madaxii Maaliyadda Daacish, kaasi oo laga soo qabtay degaanka Laag ee degmada Xumbeys.

PUNTLAND POST

The post Puntland: Maraykanka oo xaqiijiyay Hawlgalkii lagu qabtay Madaxii Maaliyadda Daacish Cabdiweli Walalac appeared first on Puntland Post.