Dowladda Puntland oo walaac xooggan ka muujisay qabsashadii Al-shabaab ee degmada Maxaas

[Deeq A.]

Dowladda Puntland oo Warsaxaafadeed soo saartay ayaa si kulul u cambaareysay weerarkii argagixiso ee ay maanta mileeshiyaadka Al-Shabaab ku qabsadeen degmada Maxaas ee gobolka Hiiraan. 

Dowladda Puntland waxay walaac weyn ka muujisay dhaqaaqyada sii kordhaya ee kooxda Al-Shabaab iyo isku dayadooda ah in ay dib u qabsadaan deggaanadii horay looga xoreeyey iyo kuwo cusub oo muhiimad juqraafi leh.

Puntland waxay sheegtay in ay aaminsan tahay in xaaladda amni ee ka sii daraysa ee gobollada dhexe ay u baahan tahay iskaashi dhab ah oo dhex mara dowladaha xubnaha ka ah dowladda Federaalka, gaar ahaan Galmudug iyo Hirshabeelle, si loo helo gorshe mideysan oo lagu wajahayo halista kooxda Al-Shabaab. 

“Argagixisadu meel walbo oo ay joogto waxay khatar ku yihiin dadkeenna iyo dalkeenna, waana lagama maarmaan in meel looga soo wadajeesto, sidaasi darteed Dowladda Puntland waxay diyaar u tahay in ay doorkeeda qaadato oo gacan ka geysato dadaalka kasta oo dalka looga sifeynayo argagixisada” ayaa lagu yiri Warsaxaafadeedka Puntland.

Dowladda Puntland waxay ugu baaqday beesha caalamka in ay si buuxda u garab istaagto dowladda Federaalka Soomaaliya iyo dowladaha xubnaha ka ah dowladda Federaalka, iyagoo siinaya taageero muuqata oo dhanka amniga iyo sirdoonka, sil loo xoojiyo dagaalka ka dhanka ah kooxaha xagjirka ah ee khalkhalgelinaya xasilloonida dalka. 

PUNTLAND POST

The post Dowladda Puntland oo walaac xooggan ka muujisay qabsashadii Al-shabaab ee degmada Maxaas appeared first on Puntland Post.