Puntland oo Villa Somali ku eedeysay dagaalkii galabta ka dhacay degmada Dhahar

[Deeq A.]

Dowladda Puntland oo war Rasmi ah ka soo saartay dagaalkii galabta ka dhacay degmada Dhahar ayaa si adag u cambaareysay dowladds Federaalka Soomaaliya oo ay ku eedeysay in ay maalmahan colaad ka hurinayso degaannada Puntland ee nabdoon.

Wasiirka Arrimaha gudaha Puntland, Cabdi Faarax Siciid Juxaa oo warkan soo saaray ayaa yiri”Waxaan si adag u cambaaraynaynaa Dawladda Federaalka ah oo maalmahan Gobollada Puntland ee nabadda ah ka dhex wadda Hurin colaadeed, kicin bulsho iyo degenaansho la’aan.”

“Waxaan kaloo sida ugu adag ugu cambaaraynaynaa Xukuumadda XSM in ay galabta Maleeshiya hubaysan oo ay soo abaabushay ay Degmada Dhahar ee Gobolka Haylaan ka abuureen xiisad colaadeed keentay dhimasho nafeed. Falkan gurracan oo ah mid lagu dhabar-jebinayo halganka xaqa ah ee ay Puntland kula jirto Argagixisada Caalamiga ah ee #Daacish iyo #AS ee buuraha #CALMIDKAAD iyo #CALMADOW  wuxuu noqonayaa mid Dawladda Federaalka ah lagula xisaabtamo.”

“Waxaa nasiib darro ah in Xukuumadda XSM oo ku fashilantay dhamaan hawlihii loo igmaday inay iyadoo isticmaalaysa deeqihii caalamiga ahaa ee Soomaaliya loogu talo galay ay qori dab leh kula dhex wareegto Gobollada Puntland ee nabadda una soo jeensato wax dumin keli ah. Shalay RAASKAMBOONI maanta DHAHAR” ayuu sii raaciyay Wasiir Juxaa.

Hadalka Wasiir Juxaa ayaa imaanaya xilli uu galabta degmada Dhahar ee gobolka Haylaan ka dhacay dagaal u dhexeeya ciidamada dowladda Puntland iyo mileeshiyaad hubaysan oo daacad u ah Wasiirka Ganacsiga Soomaaliya, Maxamuud Axmed Geesood, kuwaasi oo dhawaan laga qoray degaankaasi.

Halkaan ka akhriso Qoraalka Wasiirka

PUNTLAND POST

The post Puntland oo Villa Somali ku eedeysay dagaalkii galabta ka dhacay degmada Dhahar appeared first on Puntland Post.