Madaxweyne ku xugeenka Somaliland oo xadhigga uga jaray dhismaha dayactirka ee Wasaaradda Ganacsiga iyo Dalxiiska

[Deeq A.]

Madaxweyne Ku-xigeenka Jamhuuriyadda Somaliland, Mudane Ambassador Maxamed Cali Aw-Cabdi, ayaa si rasmi ah xadhigga uga jaray dhismaha dayactirka ee Wasaaradda Ganacsiga iyo Dalxiiska Jamhuuriyadda Somaliland.

Munaasibadda xadhig-ka-jarista oo si heer sare ah loo agaasimay, waxa Madaxweyne Ku-xigeenka ku weheliyey Wasiirka Wasaaradda Ganacsiga iyo Dalxiiska, Mudane Cabdiraxmaan Xasan Nuur, Wasiir Ku-xigeenka Wasaaradda, Mudane Jawhar Siciid Warsame, iyo Agaasimaha Guud ee Wasaaradda, Mudane Maxamuud Xuseen Aadan. Waxa kale oo ka qeybgalay Wasiirka Wasaaradda Maalgashiga, Badhasaab ku xigeenka, marti sharaf kale.

Intaa ka dib, Madaxweyne Ku-xigeenku waxa uu kormeer ku sameeyey qaar kamid ah xafiisyada ee wasaaradda, isaga oo warbixinno faahfaahsan ka dhageystay masuuliyiinta waaxyaha kala duwan. Kormeerkan ayaa diiradda lagu saaray dardar-gelinta howlaha shaqo iyo tayeynta adeegyada ganacsatada iyo bulshada.

Ugu dambayn, Madaxweyne Ku-xigeenka ayaa shahaado-sharaf guddoonsiiyey Wasiirka Wasaaradda Ganacsiga iyo Dalxiiska, Mudane Cabdiraxmaan Xasan Nuur, isagoo uga mahadceliyey dadaalka uu ku bixiyey horumarinta adeegyada wasaaradda.

Qaran News