Puntland: Dhaq dhaqaaq siyaasadeed iyo xiisad ka aloosan Gobollada Sanaag iyo Highland

[Deeq A.]

Loollan xooggan ayaa ka aloosan gobollada Sanaag iyo Highland, halkaasi oo ay dhaq dhaqaaq siyaasadeed ka wadaan siyaasiyiin ay riixayso Villa Somalia, kuwaasi oo doonaya in degaannadaasi ku biiraan Maamulka SSC-khaatumo.

Mas’uuliyiin ka tirsan dowladda Federaalka Soomaaliya oo labadaasi gobol ka soo jeeda ayaa qorshaynaya in ay socdaal ku tagaan degmooyinka; Badhan, Dhahar iyo Xingalool oo ay ka qoreen ciidamo heer federaal ah; waxa ay doonayaan in ay magaalada Ceelbuh ku qabtaan shir ku saabsan in gobolladaasi lagu daro Khaatumo.

Guddoomiyihii hore ee Baarlamaanka Puntland, Cabdirashiid Yuusuf Jibriil oo kamid ah siyaasiyiinta loo xilsaaray hawshaasi ayaa hadda ku sugan degaanka Ceelbuh, halkaasi oo ay ku ilaalinayaan ciidamo sheegay in ay taabacsan yihiin Villa Somalia, halka dhinaca kale siyaasiyiinta u dhashay Sanaag iyo Highland ee xilalka ka haya Puntland ay wadaan abaabul ciidan oo ka horjeeda arrintaasi.

Odayaasha dhaqanka Sanaag iyo Highland oo ay ku jiraan isimada guud ilaa iyo hadda kama muuqdaan dhaq dhaqaaqyada siyaasadeed ee siyaasiyiinta Villa Somalia riixayso ka wadaan labadaasi gobolka, si ay ugu biiraan Maamulka Khaatumo.

PUNTLAND POST

The post Puntland: Dhaq dhaqaaq siyaasadeed iyo xiisad ka aloosan Gobollada Sanaag iyo Highland appeared first on Puntland Post.