Nin hubeysan oo dad badan ku laayay Masjid, kadib markii..

[Deeq A.]

Kabul (Caasimada Online) – Ugu yaraan lix qof ayaa lagu dilay weerar uu nin hubeysan ku qaaday Masjid ku yaalla galbeedka Afghanistan, waxaa sidaas Talaadada maanta ah sheegay afhayeen u hadlay dowladda.

Afhayeenka wasaaradda arrimaha gudaha Abdul Mateen Qani ayaa sheegay in habeenkii Isniinta, abaare 9:00 pm “uu qof aan haybtiisa la garan toogtay shacab ku cibaadeysanayey masjid” ku yaalla degmada Guzara ee gobolka Herat.

“Lix shacab ah ayaa shahiiday, qof kalena waa uu dhaawacmay,” ayuu subaxii Talaadada kusoo qoray barta X.

Wakaaladda wararka dowladda ee Bakhtar ayaa sidoo kale xaqiijisay tirada dhimashada weerarka oo ka dhacay degmadan oo dhinaca koonfur ka xigta magaalada caasimad goboleedka ah ee Herat.

Inkasta oo aysan jirin cid sheegatay mas’uuliyadda weerarka, haddana dadka amniga taxliilaya ayaa sheegaya in kooxda Daacish, cutubkeeda gobolka ay tahay halista ugu weyn ee amniga Afghanistan.

Afghanistan ayaa waxaa tan iyo August 2021 xukumayey kooxda Taalibaan, oo xukunka dib ugu soo laabatay xilligaas kadib bixitaankii ciidamada Mareykanka.

Wixii markaas ka dambeeyey kooxda Daacish ayaa weerar dhowr ah oo dhimasho leh ka fulisay dalka.

VOA + AFP

The post Nin hubeysan oo dad badan ku laayay Masjid, kadib markii.. appeared first on Caasimada Online.