Baarlamaanka Puntland oo Markale Diiday Ansixinta Mas’uuliyiin uu Deni Magacabay

[Deeq A.]

Baarlamaanka dowlad gobaleedka Puntland ayaa markale maanta ku gacan seeray ansixinta xubnaha maxkamadda sare ee Puntland, kuwaas oo madaxweynaha markale uu dib u soo magacabay.

Xildhibaannada ayaa cod aqlabiyad ah ku diiday mas’uuliyiinta maxkamadda sare ee Puntland Deni u magacabay, xilli horay xubnahaan ay baarlamaanka u diideen in ay ansixiyaan.

Madaxweynaha Puntland oo horay baarlamaanka ay ugu celiyeen garsoorka maxkamadda sare ee Puntland, ayaa markale ku adkeystay in uu soo magacabay mas’uuliyiintaan.

Kulanka baarlamaanka ay maanta ku yeesheen xaruntooda magaalada Garowe, ayaa waxaa soo xaadiray 40 xildhibaan, kuwaas oo ka soo horjeystay in dib golaha loogu soo celiyo ansixinta xubnaha maxkadda sare ee Puntland oo ay horay u diideen.

Guddi gaar ah oo baarlamaanka uu arrintaan u xilsaaray ayaa baarlamaanka u soo gudbiyay tala bixin ay kasoo talabixiyeen mas’uuliyiinta cusub ee madaxweynaha Puntland u soo magacabay maxkmadda sare.

Guddiga ayaa soo jeediyay qodobadaa:

1. Guud ahaan nidaamka Garsoorka Puntland waxaa lagama maarmaan ah inuu noqdo mid hufan, daacad ah, aqoon iyo kartina u leh arrimaha Garsoorka, laguna kalsoonaan karo, sidaas awgeed, waa in la helaa Garsoorayaal iyo Guddi maamul oo hufan, isla markaana buuxiyey shuruudaha sharciga ah ee doorashada Garsoorayaasha Maxkamadda Sare, si waafaqsan qodobka 91-aad ee Dastuurka.

2. Si loo fuliyo qodobka 88-aad ee Dastuurka waxaa waajib ah in Xukuumaddu soo magacawdo Guddiga Culimada Diinta oo door muhiim ah ku leh magacaabista Garsoorayaasha Shareecada Islaamka.

3. Waxaa waajib ah in magacaabista Garsoorayaasha Maxkamadda Sare loo maro habraac waafaqsan qodobka 76-aad xarafka (r) oo sheegaya awoodaha iyo mas’uuliyadaha Golaha Xukuumadda, una dhigan “Golaha Xukuumaddu wuxuu leeyahay Magacaabidda Garsoorayaasha Maxkamadda Sare, laba (2) garsoore oo Maxkamadda dastuuriga ah ku biiraya, Xeer-ilaaliyaha guud, Hanti-dhawrka Guud iyo Guddoomiyaha Bankiga, ka dibna la horgeeyo Golaha Wakiillada si uu u ansixiyo”.

4. Madaxweynuhu markuu maro habraaca ku xusan qodoka 76-aad, xarafka (r), wuxuu soo magacaabayaa Guddoomiyaha iyo Garsoorayaasha Maxkamadda Sare sida uu qabo qodobka 80-aad farqadiisa 18-aad oo u dhigan “ Madaxweynuhu markuu la tashado Madaxweyne ku xigeenka wuxuu magacaabaa Guddoomiyaha iyo Garsoorayaasha Maxkamadda Sare” . Haddaba, si loo dhawro qodobbada dastuurka ee kor ku xusan, waxaa waajib ah in Magacaabista Garsoorayaasha Maxkamadda Sare la soo mariyo Golaha Xukuumadda si loogu soo gudbiyo Golaha Wakiillada DPL.

5. Xubnaha Garsoorka ee waaya codka kalsoonida Golaha Wakiillada dib looguma soo celin karo Golaha, mana jiro qodob sharci ah oo arrintaas bannaynayaa.

6. Madaxweynuhu, waxaa keliya ee uu xaq u leeyahay Golahana ku soo celin karaa;

i. Xeer Goluhu meel mariyey sida uu qabo qodobka 72-aad ee dastuurka una dhigan “Madaxweynuhu wuxuu awood u leeyahay inuu diidmada qayaxan isku hortaago sharci uu meel mariyey Golaha Wakiilladu, isaga oo diidmadiisa raacinaya qoraal sababaysan”.

ii. Inuu hal mar Golaha Wakiillada dib ugu celiyo Golaha Xukuumadda ee kalsoonida waayey sida uu qabo qodobka 67-aad farqadiisa 6-aad una dhigan “Madaxweynuhu wuxuu awood u leeyahay inuu hal mar Golaha Wakiillada dib ugu celiyo magacaabidda Golaha Xukuumadda ee kalsoonida waayey”.

7. Ma jiro wax cuskasho sharci ah oo bannaynaya in dib loo soo magacaabi karo, loona soo gudbin karo Golaha Wakiillada Xubnihii Garsoorayaasha Maxkamadda Sare ee kalsoonida waayey Luulyo 04, 2022, sidaas awgeed, waxa waajib ah in Madaxweynuhu soo magacaabo Garsoorayaasha Maxkamadda Sare oo aaney ku jirin xubnihii waayey kalsoonida Golaha. Sidoo kale, ma jiraan Garsoorayaal Maxkamadda Sare ah oo sifo sharci ah ku shaqaynaya inta laga soo magacaabayo Garsoorayaasha cusub Goluhuna ansixinayo.

Intaas kadib mudanayaasha fadhiga soo xaadiray ayaa laga codsaday in ay cod gacan taag ah ay ku ansixiyaan mas’uuliyiinta maxakamdda sare ee Puntland loo soo magacaabay.

40 mudane oo fadhiga joogtay ayaa 30 kamid ah ay diideen dib u soo celinta xubnahaan, halka 7 mudane ay diideen in ay ansixiyaan, xilli 3 xildhibaan ay ka aamuseen.

Goobjoog News

Source: goobjoog.com