QM oo xayiraad hor leh ku soo rogtay Soomaaliya iyo walaaca cusub ee sababay

[Deeq A.]

Muqdisho (Caasimada Online) – Golaha amaanka ee Qaramada Midoobay ayaa cod aqlabiyad leh ugu codeeyay in Soomaaliya laga joojiyo u rarida walxaha qarxa ama laga sameeyo aaladaha dilaaga ah ee qarxa, xili ay gudaha dalka si weyn uga taagan tahay khatarta argagixisada.

Kulan uu shalay yeeshay golaha amaanka QM ayaa lagu meel-mariyey in laga hortago iibinta ama u rarida Soomaaliya ee walxaha qarxa , iyadoo ay jirto ‘qatar weyn’, iyaga oo sheegay in loo isticmaali karo weerarada Al-Shabaab ee dadka badan lagu haligo.

Dowladda federaalka Soomaaliya ayuu goluhu usoo jeediyay inay sii labo jibaarto dagaalka ay kula jirto kooxaha xagjirka ah, oo muddooyinkii dambe kusii xoogeysanayay koonfurta iyo bartamaha Soomaaliya.

Qaraarkaasi ayaa waxa lagu ansixiyey ’13-0′, iyada oo ay u codeeyeen dalalka Ruushka iyo Shiinaha, taasi oo sii adkeynaysa cunaqabateynta hubka ee saaran Soomaaliya, isla markaana ka hor imaneysa dib u iibinta ama wareejinta wixii hub ama qalab millateri ah.

Qaramada Midoobay ayaa hore u baahisay warbixin ay ku sheegtay in kooxaha xagjirka ah ay gudaha Soomaaliya ka ururiyaan lacago baad ah oo dhan 21-Milyan, midaasi oo walaac uga muujisay khatarta amni ee dalka.

Ugu dambeyntiina golaha ayaa si wada-jir ah u cambaareeyay weerarada Al-Shabaab ay ka geystaan gudaha Soomaaliya iyo dalalka deriska, iyagoona muujiyay walaac ay ka qabaan joogitaanka kooxo xiriir la leh kooxda Daacish ee gudaha Soomaaliya.

Qaraarkan ayaa imanaya xili ay muddooyinkii dambe sarre u kacayeen weerarada Al-Shabaab, iyago oo isla sanadkan gudihiisana dhowr hoobiye ku garaacay garoonka diyaaradaha caalamiga ee aadka loo ilaaliyo, halkaas oo ay ku yaallaan safaaradda Mareykanka iyo xarumo muhiim ah.

The post QM oo xayiraad hor leh ku soo rogtay Soomaaliya iyo walaaca cusub ee sababay first appeared on Caasimada Online.