Faah faahino ka soo baxaya dagaal ka dhacay Jubbada Hoose

[Deeq A.]

Dagaalyahano ka tirsan Al-Shabaab ayaa maanta weerar ku billowday qarax ku qaaday saldhig ciidan oo ku yaalla deegaanka Baarsanguuni ee gobolka Jubbada Hoose.

Weerarka ayaa waxaa xigay dagaal toos ah oo dhex-maray ciidamada dowladda kuwa Jubbaland oo dhinac ah iyo dagaalyahanada Xarakada Al-Shabaab.

Afhayeenka wasaaradda amniga Jubbaland, Cabdinuur Ibraahim oo u warramay Shabelle ayaa sheegay in ciidamadu ay ka hortageen weerarka ay soo qaadeen Al-Shabaab.

Sidoo kale afhayeenka ayaa tilmaamay in dagaalkaasi oo ka dhacay duleedka Baarsanguuni lagu dilay in ka badan 10 dagaalyahan, sida uu hadalka u dhigay.

Xaaladda ayaa haatan degan, waxaana goobihii lagu diriray howl-gallo ka wada ciidamada Bangarafta Soomaaliya iyo kuwa daraawiishta ee maamulka Jubbaland.

View the full article