Ciidamada Danab oo weerar ku qaaday deegaanka Daaru-Salaam

[Deeq A.]

Wararka ka imaanaya gobolka Shabeelaha Hoose ayaa sheegaya in maanta dagaal u dhexeeyey ciidamada dowladda iyo Al-Shabaab uu ka dhacay gobolkaasi.

Dagaalka oo ahaa mid culus ayaa yimid, kadib markii ciidamada sida gaarka ah u tababaran ay gudaha galeen deegaanka Daaru-Salaam, xilli uu shir uga socday halkaasi saraakiil ka tirsan Xarakada Al-Shabaab, waxaana halkaasi ka dhacay dagaal xoogan.

Taliyaha guutada 16-aad ee ciidamada Danab Gaashaanle Ismaaciil Cabdi Maalik oo u warramay warbaahinta dowladda ayaa sheegay in dagaalkaasi ay dileen illaa 10 xubnood oo ka tirsanaa Al-Shabaab, sidoo kalena ay ku dhaawaceen tiro intaasi ka badan.

Maalin ayaa intaasi ku daray in haatan ay ku sugan yihiin gudaha Daaru-Salaam, islamarkaana ay saaareen dagaalyahanada Al-Shabaab, sida uu hadalka u dhigay.

Xaaladda ayaa haatan ah mid aad u kacsan, waxaana weli dhaq-dhaqaaqyo laga dareemayaa qeybo badan oo ka mid ah gobolka Shabeelaha Hoose.

View the full article