Sarkaal ka tirsan Militeriga oo caawa lagu toogtay magaalada Muqdisho

[Deeq A.]

Muqdisho (Caasimada Online)-Maleeshiyaad ka tirsan al-Shabaab ayaa goordhow oo caawa ah toogasho ku dilay Sarkaal ka tirsan ciidamada Xoogga dalka, oo ka howlgali jiray Wasaarada Difaaca Somalia.

Dilka Sarkaalka ayaa waxaa fuliyay Seddex maleeshiyo oo ku hubeysnaa bastoolado, waxa uuna dilka Sarkaalkan ka dhacay xaafada Macalin Nuur ee degmada Dharkeynley.

Dilka Sarkaalkaan lagu magacaabo Yuusuf ayaa si gaara uga dhex dhacay xarun Ganacsi oo uu ku lahaa xaafada Macalin Nuur, isla goobta ayuuna ku geeryooday.

Dilka kadib waxaa goobta ka baxsaday maleeshiyaadka dilka geystay, waxaana qadar kooban kadib halkaa gaaray ciidamo ka tirsan dowlada oo Meydka Sarkaalka u qaaday Xarunta danbi barista.

Dilalka qorsheysan ayaa muddooyinkan dambe Magaalada Muqdisho ee caasimadda Soomaaliya ka yaraa, sababo ku aadan Koontaroolada ciidanka ee baarista oo aad loo badiyay.

Caasimada Online

Xafiiska Muqdisho

Caasimada@live.com