Somaliland approves a new electoral commission.

[GAAROODI]

Hargeysa(Oodweynenews)- Golaha Wakiilada Somaliland ayaa lagu talo-jiraa in maalinta Sabtida ah ee barrito ay guda-galaan ansixinta xubnaha cusub ee loo soo xulay Komishanka doorashooyinka, iyada isla halkaas guddida arrimaha guduhu ay ku soo bandhigi doonaan macluumaadka iyo CV-yada todobada xubnood ee Guddida doorashooyinka loo soo xulay.

 

Fadhiga uu Guluhu yeelanayo maalinta berrito oo ah fadhi aan caadi ahayn ayay si qumaati ah ugu geli doonaan cod-u-qaadista ansaxinta xubnaha cusub ee komishanka, iyada oo la filayo in goluhu si weyn uga taxa-dirayo ansixintooda. Waxaana halkaas warbixin la xidhiidha macluumaadka iyo xogta Toddobada qof ee loo magacaabay Komishanka doorashooyinka, taas oo ay isku soo dubo rideen Guddi hoosaadka Arrimaha Gudaha ee Golaha Wakiilada, kuwaa oo maalmihii la soo dhaafay kala baadhayay sida xubnahan la soo xulay ay u buuxiyeen shuruudihii laga doonayay xubinimada Komishanka doorashooyinka qaranka ee ku cad xeerka doorashooyinka madaxtooyada iyo Goleyaasha deegaanka.

 

Waxaa kaloo si weyn loo naawilayaa in Goluhu aad uga fiirsanayo ansixinta xubnaha cusub, -mid si aanay u noqon kuwo hadhaw marka shaqo gala qoomamoodo, iyaga oo mid ay cod gacan-taag ah ku ansixin doonaana.

 

Waxaana fadhigan aan caadiga ahayn dalbaday Madaxweyne Daahir Rayaale, oo xlidhibaanada Golaha ka codsay in ay isugu yimaadaan fadhi degdeg ah, si loo ansixiyo xubnaha cusub ee doorashooyinka. waxaana Komishankani waa kii saddexaad ee noociisa ah ee laga hirgeliyay dalka, waxaana komishankan horyaala hawl baaxad leh oo ah in ay dalka ka hirgeliyaan doorashadii madaxtooyada iyadoo lagu salaynayo diiwaan gelintii codbixiyeyaasha.