Golaha Mustaqbalka oo sheegay in ay dib u eegis ku sameyn doonaan tubta wadahadallada Muqdisho

[Deeq A.]

Golaha Mustaqbalka Soomaaliyeed ayaa cambaareeyey go’aankii Dowladda Federaalka Soomaaliya ku celisay diyaaradihii waday ciidanka ilaalada madaxweynayaasha Puntland iyo Jubaland.

War-saxaafadeed ka soo baxay Golaha Mustaqbalka ayaa lagu sheegay in iyaga iyo Dowladda Federaalka hore heshiis uga gaareen ogolaanshaha ilaalada madaxda ka qaybgalaysa shirka wadahadallada Muqdisho, islamarkaana go’aanka maanta yahay mid qar iska xoornimo ah oo khatar geliyay wafuudii saarnayd diyaaradaha la celiyay.

Golaha wuxuu ku eedeeyay Dowladda uu hoggaamiyo madaxweyne Xasan Sheekh in ay tan markii ay aqbaleen gogasha Muqdisho ay qaaday tallaabooyin lagu carqaladeynayo, kuwaas oo ay ka mid yihiin kulamo iyo hadallo wax u dhimaya shirka, wax ka baddelka dastuurka iyo diyaaradaha la celiyay.

Golaha Mustaqbalka Soomaaliyeed wuxuu xusay in uu diyaar u yahay wadahadallada, balse ay dib u eegis ku sameyn doonaan tubta wadahadallada Muqdisho.

PUNTLAND POST