Kadib go’aankii dowladda Jarmalka, wafdi sare oo yimid Muqdisho + Sawirro

[Deeq A.]

Muqdisho (Caasimada Online) – Wafdi heer sare ah oo ka socday Dowladda Jamhuuriyadda Federaalka Jarmalka oo uu hoggaaminayo Madaxa Xiriirka Dowladaha ee Fedaalka Booliiska, Colonel Niels Zimmermann ayaa booqasho shaqo ku yimid dalka.

Wafdigan ayaa kulan heer sare ah la yeeshay Madaxda Hay’adda Socdaalka iyo Jinsiyadda (HSJ) oo ugu horreeyo Agaasimaha Guud, Mustafa Dhuxulow.

Booqashadan oo ka qabsoontay magaalada Muqdisho intii u dhaxaysay 21–22 Janaayo 2026 ayaa ujeeddadeedu ahayd xoojinta xiriirka laba-geesoodka ah, is-dhaafsiga khibradaha iyo horumarinta wada-shaqeynta dhinacyada maareynta socdaalka, sugidda amniga xuduudaha, horumarinta baasaboorka Soomaaliga iyo la dagaallanka socdaalka sharci-darrada ah.

Inta lagu guda jiray booqashada shaqo, wafdiga Jarmalka ayaa booqday Garoonka Diyaaradaha Caalamiga ah ee Aadan Cadde, halkaas oo ay si dhow uga indha-indheeyeen maareynta rakaabka imanaya iyo kuwa baxaya.

Wafdiga ayaa la geeyay khadadka koontaroolka 1aad iyo 2aad, hawlaha Qaybta Baarista Dukumentiyada iyo Fraud Detection Unit, iyo nidaamka guud ee maareynta xuduudaha, iyagoo si gaar ah u eegay dowrka HSJ ee sugidda amniga qaranka.

Agaasimaha guud ee hay’adda socdaalka, Mustaf Dhuxulow oo wafdiga si rasmi ah u soo dhaweeyay Yaa si gaar ah uga mahadceliyay Dowladda Jarmalka aqoonsiga Baasaboorka Diblumaasiga ah ee Jamhuuriyadda Federaalka Soomaaliya, taas oo muujinaysa kalsooni iyo xiriir diblumaasiyadeed oo adag.

Agaasimaha ayaa sidoo kale adkeeyay sida ay hay’addu uga go’an tahay xoojinta wada-shaqeynta iyo iskaashiga caalamiga ah, isla markaana xoogga saartay is-dhaafsiga khibradaha, si loo dhiso hay’ad awood leh oo la jaanqaadaysa hay’adaha caalamiga ah.

Kulamada labada dhinac ayaa lagu gorfeeyay waajibaadka iyo qaab-dhismeedka hay’adda socdaalka, mudnaanta istiraatiijiyadeed ee hay’adda, iyo dadaallada la xiriira ka hortagga tahriibka dadka, dambiyada abaabulan, iyo socdaalka sharci-darrada ah ee dhulka, cirka, iyo badda.

Sidoo kale, waxaa si qoto dheer looga wada hadlay fursadaha iskaashi ee mustaqbalka, taageerada farsamo, is-dhaafsiga macluumaadka, iyo xoojinta awoodda shaqaalaha hay’adda.

Booqashada wafdigan ayaa imaneysa xilli Dowlada Jarmalka ay si buuxda u aqoonsatay Baasaboorka Diblomaasiga ee Soomaaliya. Tallaabadan ayaa ah mid muhiim ah oo xoojineysa xiriirka diblomaasiyadeed iyo fududeynta socdaalka labada dal.

Baasaboorka Soomaaliya ayaa si tartiib tartiib ah usoo ceshanaya maqaamkiisii caalamiga ahaa, taasoo astaan u ah dadaallada diblomaasiyadeed ee dalka ee sii kordhaya iyo adkaysiga uu muujiyay kadib tobannaan sano oo uu go’doon kaga jiray dunida inteeda kale sababo la xiriira ammaan-darro iyo masiibooyin dabiici ah.

Tan iyo markii uu qarxay dagaalkii sokeeye sannadkii 1991-kii, Baasaboorka Soomaaliga waxa uu soo maray isbeddello is-daba-joog ah, oo ay ku jirto soo bandhigidda nooc casri ah oo leh muddo ogolaansho oo gaaraysa shan sano.

Isbeddelladan ayaa ka tarjumaya dadaallada ballaaran ee dalka loogu jiro dib-u-dhiska hay’adaha dowliga ah iyo xoojinta maqaamkiisa caalamiga ah.

The post Kadib go’aankii dowladda Jarmalka, wafdi sare oo yimid Muqdisho + Sawirro appeared first on Caasimada Online.