Galmudug oo ku baaqday in xilka laga qaado madaxweynaha dalka…

[Deeq A.]

Dhuusamareeb (Caasimada Online) – Madaxweyne Ku-xigeenka Dowlad-goboleedka Galmudug, Cali Daahir Ciid ayaa si adag uga jawaabay hadallada gafka ah ee kasoo yeeray Madaxweynaha Mareykanka, Donald Trump, kaasi oo uu ku baaqay in xilka laga qaado.

Cali Ciid ayaa Trump ku eedeeyay inuu noqday burcad-badeedka ugu weyn ee waayahan casriga ah, kadib markii uu xoog ku qaatay khayraadka Venezuela.

“Waa inaad is casishaa ama aad wajahdaa xil-ka-qaadis,” ayuu yiri Madaxweyne Ku-xigeenka Galmudug oo bartiisa X (ex-Twitter) ku baahiyay qoraal uu ugu jawaabayo Madaxweyne Trump.

Sidoo kale waxa uu caddeeyay in Soomaaliya leedahay dowlad sharci ah oo la aqoonsan yahay, lagana xushmeeyo fagaareyaasha caalamka, haatana haysa guddoonka golaha ammaanka ee Qaramada Midoobay.

“Soomaaliya maanta waxaa ka talisa dowlad si caalami ah loo aqoonsan yahay, taas oo hadda hoggaamineysa Golaha Ammaanka ee Qaramada Midoobay, isla markaana maamusha hay’ado amni oo badan kuwaas oo si guul leh u soo afjaray burcad-badeednimadii mar ka jirtay baddeeda,” ayuu yiri.

Trump oo marar kala duwan weerar afka ah ku qaaday Soomaaliya ayaa ku tilmaama dal fashilmay oo dowlad laheyn, in dadkiisu is-dilaan, isla markaana ay ku badan yihiin burcad-badeedda.

“Soomaaliya ma aha dal iyo wax u eg, Mareykan ayey yimaaddaan Soomaalidu, si ay u taajiraan, mana shaqaystaan,” ayuu Trump ku yiri weerarkii u dambeeyay ee ku qaado Soomaaliya.

Hadallada Trump oo dhaliyay fal-celin xooggan ayaa si muuqata u xambaarsan cunsuriyad wayn iyo jees-jees, isaga oo aan lahayn isku xirka hadal siyaasadeed oo rasmi ah.

Madaxweynaha dowladda Mareykanka oo caan ku ah hadallo soo noq-noqda iyo jees-jees, ayaa weli kusii cel-celinayo weeraro dhanka ah afka ah oo uu ku qaadayo Xildhibaan Ilhan Omar iyo dalka ay kasoo jeedo ee Soomaaliya.

The post Galmudug oo ku baaqday in xilka laga qaado madaxweynaha dalka… appeared first on Caasimada Online.