Putin oo warqadaha aqoonsiga ka guddoomay safiirka Soomaaliya

[Deeq A.]

Moscow (Caasimada Online) – Madaxweynaha dalka Ruushka, Vladimir Putin ayaa maanta waraaqaha aqoonsiga safiirnimo ka guddoomay danjiraha cusub ee Jamhuuriyadda Federaalka Soomaaliya u magacowday dalkaas, Maxamed Abuukar Zubayr.

Danjire Maxamed Abuukar ayaa qayb ka ahaa danjirayaal badan oo maanta lagu maamuusay aqalka Kremlin-ka ee dalka Ruushka looga taliyo.

Safiirka oo qoraal soo saaray ayaa tilmaamay in maanta ay astaan u tahay marxalad muhiim ah, isla markaana ka tarjumaysaa sida ay Soomaaliya uga go’an tahay horumarinta xiriir laba-geesood ah oo ku dhisan ixtiraam, is-faham, iyo iskaashi wax-ku-ool ah.

“Waxaan rajaynayaa in aan si daacad ah uga shaqeeyo xoojinta iskaashigeenna, ballaarinta meelaha ay danaheena wadajirka ahi ka dhexeeyaan, iyo horumarinta is-faham iyo wada-shaqayn qoto dheer oo u dhexeysa labada dal,” ayuu yiri Danjire Maxamed Abuukar.

Ruushka iyo Soomaaliya waxaa ka dhexeeya xiriir saaxiibtinimo oo muddo dheer ah, waxaana Danjire Maxamed Abuukar uu kaalin ka qaadanayaa in la horumariyo danaha iskaashiga labada dal waqtigan.

Hoos ka aqriso qoraalka Danjiraha oo dhameystiran:

Maanta waxa ay astaan u tahay marxalad muhiim ah oo ka mid ah sooyaalkeyga diblomaasiyadeed, anigoo helay sharafta weyn ee aan warqadaha aqoonsiga (Letters of Credence) ugu gudbiyay Madaxweynaha Dalweynaha Ruushka, Mudane Vladimir Putin.

Waxaan si qoto dheer ka mahadcelinayaa soo dhoweyntii diirranayd ee la ii sameeyay iyo fursadda qaaliga ah ee la i siiyay si aan dalkeyga Jamhuuriyadda Federaalka Soomaaliya ugu matalo xilkan muhiimka ah.

Tani waxa ay muujinaysaa kalsoonida la igu qabo, isla markaana ka tarjumaysaa sida ay Soomaaliya uga go’an tahay horumarinta xiriir laba-geesood ah oo ku dhisan ixtiraam, is-faham, iyo iskaashi wax-ku-ool ah.

Xilli ay isbeddel ku socdaan duruufaha caalamiga ah, isla markaana ay dunidu wajahayso isbeddello ku yimid danaha istaraatiijiyadeed, isbahaysiyada soo ifbaxaya, iyo masuuliyadaha wadajirka ah, wada-hadal iyo iskaashi dhex mara dalalka ayaa noqday kuwo ka sii muhiimsan sidii hore.

Waxaan rajaynayaa in aan si daacad ah uga shaqeeyo xoojinta iskaashigeenna, ballaarinta meelaha ay danaheena wadajirka ahi ka dhexeeyaan, iyo horumarinta is-faham iyo wada-shaqayn qoto dheer oo u dhexeysa labada dal.

Anagoo adeegsanayna diblomaasiyad iyo wada-tashi, waxaan aaminsanahay in aan si wadajir ah uga gudbi karno caqabadaha jira, isla markaana aan ka shaqayn karno mustaqbal xasilloon oo barwaaqo leh oo u dan ah shucuubteenna.

Waxaan si guud ugu mahadcelinayaa dhammaan intii igu garab istaagtay sooyaalkaan. Dhiirrigelintiinna iyo hagiddiinna waxa ay ahaayeen kuwo qiimo weyn leh.

Sidoo kale, waxaan si gaar ah ugu mahadnaqayaa Madaxweynaha Jamhuuriyadda Federaalka Soomaaliya, Mudane Dr. Xasan Sheekh Maxamuud, kalsoonida iyo sharafta uu i siiyay, iguna aaminay xilkan mudnaanta leh.

The post Putin oo warqadaha aqoonsiga ka guddoomay safiirka Soomaaliya appeared first on Caasimada Online.