Erdogan oo bin Zayed kala hadlay arirnta Soomaaliya xlli lagu tuhmayo Imaaraadka…

[Deeq A.]

Istanbul (Caasimada Online) — Madaxweyne Recep Tayyip Erdogan ayaa Isniintii u sheegay Madaxweynaha Isutagga Imaaraadka Carabta, Sheekh Maxamed bin Zayed Al Nahyan, in Turkigu uu taageersan yahay “midnimada iyo wadajirka dhuleed” ee Soomaaliya, sida ay shaacisay Madaxtooyada Turkiga.

Warbixinta Turkiga ayaa lagu sheegay in labada hoggaamiye ay ka wada hadleen xiriirka laba-geesoodka ah iyo arrimaha guud ee gobolka.

Erdogan ayaa sidoo kale ku celiyay taageerada Turkiga ee midnimada Yemen, isagoo dhanka kalena soo hadal qaaday xaaladda Gaza, kuna baaqay tallaabooyin degdeg ah oo dib-u-dhis loogu sameynayo iyo in la soo afjaro dhibaatada bani’aadannimo.

Wada-hadallada labada dhinac ayaa kusoo beegmaya maalmo uun kadib markii Israa’iil ay noqotay dalkii ugu horreeyay ee si rasmi ah u aqoonsada gobolka Somaliland inay tahay dowlad madax-bannaan. Go’aankaas ayaa sii huriyay xiisadaha diblomaasiyadeed ee Geeska Afrika, wuxuuna dhaliyay doodo ka dhex aloosma Qaramada Midoobay.

Israa’iil ayaa aqoonsiga ku shaacisay bayaan wadajir ah oo ay la saxiixatay Madaxweynaha Somaliland, Cabdiraxmaan Maxamed Cabdullaahi (Cirro), iyadoo sheegtay inay iskaashi ka sameyn doonaan dhinacyada caafimaadka, beeraha, teknoolajiyadda iyo dhaqaalaha.

Dowladda Soomaaliya ayaa tallaabadaas ku tilmaamtay mid sharci-darro ah, waxayna sheegtay inay qaadi doonto tallaabooyin diblomaasiyadeed, siyaasadeed iyo sharci ah si ay u difaacdo madax-bannaanideeda iyo xuduudaheeda caalamiga ah ee la aqoonsan yahay.

Turkiga ayaa isku taagay inuu yahay mid ka mid ah saaxiibada ugu dhow ee Muqdisho iyo difaaca ugu weyn ee midnimada dhuleed ee Soomaaliya.

Todobaadkii hore, Erdogan ayaa go’aanka Israa’iil ee Somaliland ku tilmaamay “sharci-darro aan la aqbali karin” xilli uu shir jaraa’id la qabanayay Madaxweynaha Soomaaliya Xasan Sheekh Maxamuud.

Taageerada Ankara ayaa barbar socota raad istiraatiijiyadeed iyo mid dhaqaale oo sii kordhaya. Turkiga ayaa sannadkii 2017-kii magaalada Muqdisho ka furay saldhigga tababarka milateri ee ugu weyn ee uu ku leeyahay meel ka baxsan dalkiisa, wuxuuna sanadihii dambe ballaariyay iskaashiga difaaca, oo ay ku jiraan heshiisyo lagu taageerayo amniga badaha.

Tamarta ayaa sidoo kale udub-dhexaad u noqotay xiriirka labada dal. Todobaadkii hore, Turkiga ayaa ku dhawaaqay qorshe uu bisha Febraayo ku bilaabayo hawlgalkiisii ugu horreeyay ee shidaal qodis badda ah oo uu ka sameeyo biyaha Soomaaliya, taas oo daba socota heshiiskii iskaashiga tamarta ee 2024-kii.

Dhinaca kale, Imaaraadka Carabta ayaa xiriir ganacsi iyo mid amni oo xooggan la leh Somaliland, gaar ahaan maalgashiga muddada dheer ee shirkadda DP World ee dekedda Berbera.

Warbixin dhawaan ay daabacday wakaaladda Reuters ayaa lagu sheegay in xiriirka Imaaraadka iyo Somaliland uu wajahayo shaki horeleh kadib aqoonsiga Israa’iil. Reuters oo soo xiganeysa warbixin ay qortay Axios ayaa sheegtay in saraakiil Israa’iiliyiin ah ay xaqiijiyeen in Abu Dhabi ay gacan ka geysatay fududeynta tallaabadan diblomaasiyadeed. 

Si kastaba ha ahaatee, Imaaraadku weli si rasmi ah uma xaqiijin wax door ah oo uu ku lahaa go’aanka Israa’iil.

The post Erdogan oo bin Zayed kala hadlay arirnta Soomaaliya xlli lagu tuhmayo Imaaraadka… appeared first on Caasimada Online.