Warbaahinta caanka ah ee Israel oo guul taariikhi ah ku tilmaantay aqoonsiga rasmiga ah ee uu raysal wasaare Benjamin Netanyahu uu siiyay Somaliland

[Deeq A.]

Warbaahinta caanka ah ee dalka Israel ayaa guul taariikhi ah ku tilmaantay aqoonsiga rasmiga ah ee uu raysal wasaaraha Israa’iil Benjamin Netanyahu u fidiyey Jamhuuriyadda Somaliland oo ay sheegeen inay Somaliland ka helayso faa’iidooyin badan.

Warbaahin ay ka mid yihiin The Times of Israel, Yedioth Ahronoth, Haaretz, The Jerusalem Post, iyo kuwo kala oo ay soo turjuntay Wakaaladda wararka Somaliland ee SOLNA, ayaa ku nuuxnuuxsaday in dalkoodu noqday waddankii ugu horreeyey ee Jamhuuriyadda Somaliland u aqoonsada dawlad madax-bannaan, in ka badan soddon sanno oo ay Somaliland halgan ugu jirtay aqoonsi caalami ah.

Warbixinta Israa’iil ayaa sheegtay in Ra’iisul Wasaare Benjamin Netanyahu iyo Wasiirka Arrimaha Dibadda Gideon Sa’ar ay ku dhiiradeen go’aankan oo qallinka ku duugeen go’aanka Israa’iil ku aqoonsatay Jamhuuriyadda Somaliland, taas oo uu si mug leh uga mahadceliyey Madaxweynaha Somaliland Cabdiraxmaan Maxamed Cabdullaahi Cirro.

Warbaahinta Israa’iil ayaa sheegtay in Somaliland ay tahay waddan Muslimiin Sunni ah,oo xornimadiisa ka qaatay boqortooyada Ingiriiska 1960-kii isla markaana ay aqoonsadeen 35 dal oo Israa’iil ka mid tahay, waxaa kale oo ay xuseen in Jamhuuriyadda Somaliland ay madax bannaanideeda la soo noqotay 18-kii bishii May 1991kii, iyadoo muddadaas macaamil wanaagsan oo wax ku ool ah la lahayd dunnidda inteeda kale sidoo kale dalal dhawr ah oo awood leh kana mid yihiin UK, Ethiopia, Turkey, UAE, Denmark, Kenya iyo Taiwan – ayaa xafiisyo ku leh Somaliland.

Warbaahintani waxay soo xigteen difaacidii Maraykanka ee go’aanka ay Israa’iil ku aqoonsatay Somaliland kaas oo far waaweyn ku caddeeyay in Israa’iil xaq u leedahay inay u aqoonsato Somaliland dal madax bannaan.

Sidoo kale qaar ka mid ah warfidiyeenada Israa’iil oo ku sugan gudaha Somaliland ayaa sheegay inay la dhacsan yihiin nabadgalyada, nidaamka maamul iyo degenaanshaha ka jira Somaliland waxayna intaas ku dareen in dawladoodu ku saxsanayd aqoonsiga ay siisay Jamhuuriyadda Somaliland, Suxufiyiintan waxaa kale oo ay intaas raaciyeen inay goob joog ka noqdeen dibad baxyo ay ummadda Somaliland ku muunaynayso guusha aqoonsiga ay Israa’iil ku noqotay dalkii ugu horreeyay ee caalami ah ee Somaliland siiya aqoonsi buuxa.

Source