Isra Xirsi oo ah gabadha ay dhashay Ilhaan Cumar oo iibinaysa dharkeeda shaqo la’aan awgeed

[Deeq A.]

Gabadha xildhibaanad Ilhaan Cumar, Isra Xirsi, ayaa shaaca ka qaaday inay wali tahay shaqo la’aan tan iyo markii ay ka qalin-jabisay Barnard College oo ah jaamacad sare oo ku taalla magaalada New York.

Isra, oo 22 jir ah, ayaa la xidhay sanadkii hore kadib markii ay ka qayb-qaadatay mudaharaad ka dhan ah Israa’iil oo ka dhacay jaamacadda Columbia University, taasoo keentay in si ku-meelgaadh ah jaamacadda lagaga saaro.

Isra Xirsi, oo ah xubin firfircoon oo ka tirsan kooxda Columbia University Apartheid Divest (CUAD), ayaa bishii Abriil ee 2024 lala xidhay in ka badan 100 arday, kaddib markii ay dhiseen kaamam bannaanbax ah oo ku yaala xarunta jaamacadda Columbia. Markii la xidhay kadib, Barnard College ayaa si degdeg ah u ganaaxday, iyadoo laga eryay hoygii ardayda, ayada oo sheegtay in ay hoy la’aan noqotay oo aysan helin cunto.

Isra ayaa qoraal ay ku soo dhigtay barta Instagram ku sheegtay in shaqo la’aani hshay:“Shaqo la’aanba i heshay”, iyadoo sidoo kale xustay in ay hadda iibinayso dharkeeda hore si ay nolosha ugu maareyso.

Waxay xustay in ay ku iibinayso dharkeeda barnaamijka Depop, halkaasoo ay ku soo bandhigtay dhar ay ka mid yihiin kabaha Dr. Martens, goonooyin kala duwan iyo jaakad midabyo badan leh oo ay sheegtay in ay aad u jeclayd.

Inkasta oo ay Isra dhamaysatay waxbarashadeeda bishii May ee la soo dhaafay, hadana weli ma helin shaqo rasmi ah. Hooyadeed, Ilhaan Cumar, oo xubin ka ah Golaha Wakiilada Mareykanka, ayaa xilligaasi qoraal ku qortay Facebook ay ku muujinayso farxadda qalin-jabinta gabadheeda, waxayna tidhi: “Ma jiro farxad ka weyn tan waalidku dareemo marka uu arko ilmihiisa oo guulaystay.”

Si kastaba ha ahaatee, wararka ayaa sheegaya in ganacsiyo iyo shirkado waaweyn oo Mareykan ah ay ka biyo-diideen in ay shaqaaleysiin ardaydii ka qayb qaatay bannaanbaxyadii lagu taageerayay qadiyada Falastiin kadib markii la sheegay in nacayb iyo cagajuglayn loo gaystay ardayda Yuhuudda ah intii lagu guda jiray mudaaharaadyada lakiin lama oga in arrintaasi sabab u tahay shaqo la’aanta Isra Xirsi.

Isra Xirsi waxay tusaale u tahay arday badan oo u halgamay arrimo ay aaminsanaayeen, balse wajahay cawaaqib siyaasadeed iyo dhaqaale kadib markii ay ka horyimaadeen aragtida dowladda iyo kuwo jaamacadda.

Source