Puntland oo magaalada Gaalkacyo ka mamnuucday shirarka siyaasadeed oo aysan dowladdu ogayn

[Deeq A.]

Duqa degmada Gaalkacyo

Dowladda hoose ee degmada Gaalkacyo ayaa mamnuucday shirarka siyaasadeed oo aysan dowladdu ogayn in lagu qabto magaalada Gaalkacyo, sida ku cad go’aan ka soo baxay maamulka degmadaasi.

“Laga bilaabo maanta, waxaa si rasmi ah loo mamnuucay qabashada shirar, kulamo ama isu imaatin bulsho oo aan oggolaansho rasmi ah laga haysan Dowladda Hoose ee Degmada Gaalkacyo” ayaa lagu yiri go’aanka ka soo baxay Dowladda hoose ee degmada Gaalkacyo.

“Gaar ahaan Hotelada, Xarumaha Shirarka, iyo goobaha kale ee gaarka loo leeyahay ee ku yaala magaaladda Gaalkacyo waxaa si adag loogu wargalinayaa in aysan oggolaan karin shirar, kulamo ama wax isku imaatin ah ilaa ay helaan oggolaansho rasmi ah oo ku yimid Dowladda Hoose” ayuu sii raaciyay go’aankaasi.

Dowladda hoose ee degmada Gaalkacyo waxay sheegtay in kooxdii ama hay’addii isku dayda in ay qabato shir ama kulan dadweyne, iyadoo aan helin oggolaanshaha maamulka Degmada in tallaabo sharciga waafaqsan laga qaadi doono.

PUNTLAND POST

The post Puntland oo magaalada Gaalkacyo ka mamnuucday shirarka siyaasadeed oo aysan dowladdu ogayn appeared first on Puntland Post.