Puntland: Kuwa Kabtan Ayuub beenta ka faafinaya waxay taabacsan yihiin Daacish iyo Al-Qaacida

[Deeq A.]

Kabtan Ayuub

Dowladda Puntland oo qoraal kooban soo saartay ayaa beenisay warbixin laga sii daayay warbaahinta dalka Jarmalka, taasi oo ku eedeysay Kabtan Ayuub oo baraha bulshada caanka ah in uu ka tirsanaan jiray burcad-badeeddii Soomaalida.

Bayaan ka soo baxay wasaaradda Warfaafinta Puntland ayaa lagu beeniyay dhammaan eedeymaha ku xusan warbixintii ay xalay sii daysay warbaahinta Jarmalka ee DW iyo ARD, taasi oo Kabtan Ayuub ku eedeysay in uu baraha bulshada ka huriyo colaadda gudaha Soomaaliya, islamarkaana horay uga tirsanaan jiray burcad-badeeddii Soomaalida.

Dowladda Puntland ayaa sidoo kale ku eedeysay kuwa beenta ka faafinaya Kabtan Ayuub in ay taabacsan yihiin kooxaha Al-qaacida iyo Daacish, waxaana ay sheegtay in Kabtan Ayuub in uu ciidamada difaaca Puntland kala qeyb qaatay kuna dhaawacmay Hawlgalka Calmiskaad ee ciribtirka argagixisada Daacish, kaasi oo taageero ka helaya saaxiibada Caalamiga ah ee Maraykanka iyo Imaraatiga Carbeed (UAE).

“Kuwa beenta ka faafinaya Kabtan Ayuub waa kuwa taabacsan Al-Qaacida iyo Daacish. Kabtan Ayuub wuxu dagaal la galay Daacish isagoo ka garab dagaallamay ciidamada difaaca Puntland oo taageero ka helaya saaxiibo Caalami ah oo kala duwan sida Maraykanka iyo Imaaraatiga (UAE), waxaana soo gaaray dhaawac, isagoo diyaarad loogu qaaday isbitaalka Boosaaso” ayuu u qornaa bayaanka dowladda Puntland.

PUNTLAND POST

The post Puntland: Kuwa Kabtan Ayuub beenta ka faafinaya waxay taabacsan yihiin Daacish iyo Al-Qaacida appeared first on Puntland Post.