Maxaa ku qoran warqadaha ay daadiyeen diyaaradaha maanta lagu arkay Muqdisho?

[Deeq A.]

Muqdisho (Caasimada Online) – Iyada oo maanta ay ku beegan tahay xuska munaasabadda 65-aad ee Kowda Luulyo oo ah marka ay xoroobeen gobollada koonfureed ee dalka, sidoo kalena ay midoobeen waqooyi iyo koonfur, ayaa waxaa dabaal-degga kasoo muuqday diyaaradaha cusub ee ay soo iibsatay dowladda Soomaaliya, kuwaas oo sameeyay dhuulatus aad u wayn.

Diyaaradahan oo ah kuwa dagaalka ayaa isugu jiray kuwo ay soo iibsatay dowladda Soomaaliya iyo kuwa kale oo uu Turkiga ugu deeqay dalka, kuwaas oo haatan ka qayb-qaata dagaalka adag ee lagula jiro kooxda Al-Shabaab.

Inta ay duulimaadyada dabaal-degga ku jireen diyaaradaha ayaa soo daadiyay waraaqado lagu wacyigelinayo bulshada, kuwaas oo muujinayo in lagu jiro todobaadka xorriyadda Soomaaliya iyo sidoo kalena in dalka uu ka socdo howlgal xoreyn ah oo ka dhan ah Al-Shabaab.

“Xuska 1da Luulyo 65 guurada, xoreynta dalka iyo xuska xoriyadda” ayaa ku qorneyd warqadaha ay maanta Muqdisho ku diyaadiyeen diyaaradaha Soomaaliya.

Sidoo kale, inta uu socday bandhigga waxaa qayb ka ahaa gaadiidka ciidamada, fardo iyo geel kuwaas oo socod ku marayay waddooyinka muhiimka ah ee ku yaalla caasimadda.

Ujeedka ayaa ahaa maamuus iyo xasuus loo sameynayo halyeeyadii nafta u huray gobanimada iyo midnimada dadkeenna ee doorka wayn ka soo qaatay xorriyadda dalka.

Shacabka Soomaaliyeed ayaa dhankooda si weyn ula dhacay bandhigga ay maanta sameysay dowladda, isla markaana uu goobjoogga u ahaa Madaxweyne Xasan Sheekh, iyada oo si weyn xuska sanadkan ee Kowda Luulyo looga dareemay guud ahaan dalka.

Xuska sanadkan ayaa kusoo aaday, xilli Dowladda Soomaaliya ay isbeddal wayn ku sameysay qaab dhismeedka ciidamada iyo qalabkooda, waxaana markii ugu horreysay burburka kadib diyaarado helay ciidanka cirka ee haatan loo soo tababaray Soomaaliya.