Xuutiyiinta oo sheegay inay soo fara-gelinayaan dagaalka Iiraan ay kula jirto Israa’iil

[Deeq A.]

Xubin ka tirsan dhaq-dhaqaaqa Xuutiyiinta Yemen ee xulafada la ah Yemen ayaa Talaadadii telefishinka Aljazeera Mubasher TV ka sheegay in kooxdu ay faragelin doonto si ay Iiraan uga taageerto Israa’iil sidii ay u taageertay Falastiiniyiinta Gaza.

Mohammed al-Bukhaiti, oo xubin ka ah xafiiska siyaasadda ee dhaqdhaqaaqa Xuutiyiinta, ayaa sidoo kale mar kale u sheegay telefishinka Aljazeera Mubasher in kooxdu ay la shaqaynayso Tehraan xilli ay sii xoogaysanayso dagaalka ay kula jirto Israa’iil.

Xuutiyiinta oo weerarro ku qaadaya Israa’iil iyagoo ugu hiillinaya Falastiiniyiinta ku nool Gaza, ayaa Axaddii sheegay in ay beegsadeen Israa’iil iyagoo kaashanaya, waana markii ugu horreysay oo koox taabacsan Iiraan ay si cad u shaaciso iskaashi wadajir ah oo ku saabsan weerarrada oo ay la leeyihiin Tehran.

Warbaahinta Israa’iil ayaa Sabtidii sheegtay in milatariga Israa’iil ay dhawaan weerar ku qaadeen dalka Yemen, iyagoo isku dayay inay dilaan sarkaal sare oo ka tirsan Xuutiyiinta.

Ra’iisul Wasaaraha Israa’iil, Benjamin Netanyahu, ayaa bishii aan soo dhaaftay wacad ku qaaday inuu ka aargudi doono Xuutiyiinta kadib markii gantaal ay kooxdaasi soo ridday uu ku dhacay dhul ku yaalla agagaarka garoonka diyaaradaha ugu weyn Israa’iil.

Muuqaal uu ku baahiyay baraha bulshada, Netanyahu wuxuu ku hanjabay duqeymo, isagoo yiri: “Waan u weerarnay horey, waanan weerari doonnaa mustaqbalka.”

Gantaalka oo laga soo tuuray Yemen, ayaa waxaa adeegsaday kooxda ay taageerto Iiraan, wuxuuna ku dhacay agagaarka terminal-ka weyn ee garoonka Ben Gurion subaxnimadii Axadda, sida ay sheegeen mas’uuliyiinta Israa’iil.

Warbaahinta Israa’iil ayaa sheegtay in afar qof ay ku dhaawacmeen qaraxa, halka labo kalena ay ku dhaawacmeen intii ay Israa’iiliyiin badan raadsanayeen goobo ay gabaad ka dhigtaan. Ma jiro qof si daran u dhaawacmay uu dhaawiciisu halis yahay.

Xuutiyiinta oo ah jabhad ay Iiraan taageerto oo fadhigoodu yahay dalka Yemen, ayaa si joogto ah weeraro gantaallo ah ugu qaada Israa’iil iyaga oo garabsiinaya Xamaas oo Qasa kula dagaallamaysa Israa’iil, balse waa dhif iyo naadir in mid ka mid ah uu soo maro difaacyada casriga ah ee Israa’iil.

Kooxdan ayaa sidoo kale weeraro ku qaaday maraakiib marayey Badda Cas, taas oo uu Maraykanku kaga jawaabay in inuu kordhiyo duqeymo ka dhan ah kooxda oo lagu qaadayo qaybo badan oo ka mid ah dalkaas Yemen.

Dhanka kale, iyadoo maalmihii u dambeeyay ay weeraro is dhaafsanayeen Iiraan iyo Israa’iil, madaxweynaha Mareykanka, Donald Trump iyo hoggaamiyaha ruuxiga ah ee Iiraan, Ayatollah Cali Khamenei, ayaa baraha bulshada isku dhaafsaday hadallo 24-kii saacadood ee u dambeeyay.

Trump ayaa Talaadadii shalay qoraal uu sp dhigay bartiisa truth ku yiri: “Waan ognahay meesha uu isku qarinayo ninka isugu yeera ‘hugaamiyaha ruuxiga ah’.

“Waa bartilmaameed sahlan, balse waa ammaan – ma dili doono, ugu yaraan hadda ma dilayno.

“Ma rabno inaan gantaalo shacab lagu dhufto, ama askar Maraykan ah. Dulqaadkeenu wuu sii yaraanayaa. Ku mahadsanidiin fiirintiina arrinkaan!”.

Dhowr qoraal oo uu soo dhigay baraha bulshada, ayuu hogaamiyaha ruuxiga ah ee Iran, Ayatullah Ali Khamenei ku sheegay, in Iran aanay marnaba gorgortan ka geli doonin dagaalka Israa’iil, isagoo intaa ku daray “dagaalku wuu bilaabmay”.

Waxaa la rumeysan yahay inay yihiin faallooyinkiisii ​​​​ugu horreeyay ee dadweynaha tan iyo markii madaxweyne Trump uu sheegay in Mareykanku uu ka hortagayo in la dilo Khamenei.

Qaran News