Maxaad ka ogtahay kooxda Falastiiniyiinta ah ee Israa’iil ay hubeyso iyo qorshahooda?

[Deeq A.]

Saraakiisha Israel ayaa qirtay inay taageeraan koox hubaysan oo ka soo horjeeda Xamaas ee Gaza ka dib markii xildhibaanka mucaaradka Avigdor Lieberman uu sheegay in xukuumadda Ra’iisul Wasaare Benjamin Netanyahu ay hubayso “dambiilayaasha”.

Saraakiisha caalamiga ah ee gargaarka bini’aadantinimo ayaa ku eedeeyay kooxda uu hogaamiyo Yaasir Abu Shabab oo ka soo jeeda qabiilka Baadiyaha ah in ay dhac u geystaan ​​gawaadhi gargaar ah.

Ra’iisul Wasaare Benjamin Netanyahu ayaa qirtay in Israa’iil ay taageerto koox hubeysan oo Gaza ku sugan oo ka soo horjeeda kooxda Xamaas, ka dib hadal ka soo yeedhay wasiir hore oo ahaa in Israa’iil ay hub ku wareejisay.

Warbaahinta Israel iyo falastiiniyiinta ayaa ku waramaya in kooxda Israel ay la shaqeyneysay ay qeyb ka tahay qabiilka Bedouin ee deegaanka oo uu hogaamiyo Yaasir Abu Shabab.

Hay’adda Cilmi-baadhista ee Golaha Yurub ee Xiriirka Dibadda (EFCR) ayaa ku tilmaantay Abu Shabab inuu yahay hoggaamiyaha koox dambiilayaal ah oo ka howlgala deegaanka Rafax oo si weyn loogu eedeeyo inay dhac u geystaan ​​baabuurta gargaarka.

Xubin ka tirsan Knesset iyo wasiirkii hore ee gaashaandhigga Avigdor Lieberman ayaa u sheegay warbaahinta dadweynaha ee Kan in dowladda Netanyahu, ay “hubka siinayso koox dambiilayaal ah”.

“Waxaan ka hawlgelinnay reer Gaza oo kasoo horjeeda Xamaas. Maxay taasi ku xun tahay?” Netanyahu wuxuu ku sheegay muuqaal la soo dhigay baraha bulshada Khamiistii.

“Waa wax wanaagsan, waxay badbaadinaysaa nolosha askarta Israa’iil.” ayuu yidhi.

Michael Milshtein oo ah khabiir ku takhasusay arrimaha falastiiniyiinta oo ku sugan xarunta Moshe Dayan ee magaalada Tel Aviv ayaa wakaalada wararka ee AFP u sheegay in qabiilka Abu Shabab ay ka tirsan yihiin qabiilka Baadiyaha ah ee ku nool xadka ay wadaagaan Gaza iyo gacanka Siinaay ee Masar.

Milshtein waxa uu sheegay in Abu Shabab uu muddo ku qaatay xabsiga Gaza, isla markaana madaxda beeshiisa ay dhawaan ku eedeeyeen inuu yahay nin la shaqeeya Israel oo burcad ah.

“Waxay u muuqataa in dhab ahaantii Shabak (hay’adda amniga Israa’iil) ama (militeriga) ay u maleeyeen inay ahayd fikrad fiican in maleeshiyadan, burcadda dhabta ah, loo rogo wakiil, si loo siiyo hub iyo lacag iyo gabaad”, ayuu yidhi Milshtein.

Wuxuu intaas ku daray in Xamaas ay maalmo ka hor dileen afar xubnood oo burcad ah.

Qaar ka mid ah qabiilka, ayuu yiri, waxay ku lug lahaayeen “dhammaan noocyada fal-dembiyeedka, tahriibinta maandooriyaha, iyo waxyaabo la mid ah”.

Waxa la sheegay in Abu Shabab ay Xamaas hore ugu xukuntay in uu daroogo ka ganacsado,waxana la sheegay in walaalkii ay dileen Xamaas intii uu socday hawlgal ka dhan ah weeraradii ay kooxdaasi ku qaaday kolonyada gar gaarka ee Qaramada Midoobay.

Afhayeenka ciidamada Israel Brigadier General Effie Defrin ayaa jimcihii xaqiijiyay in militariga Israel ay taageerayaan hubaynta maleeshiyaad maxalli ah oo ku sugan Gaza.

“Waxaan dhihi karaa waxaan wadnaa siyaabo kala duwan oo ka dhan ah maamulka Xamaas,” ayuu Defrin ku yidhi shir jaraa’id oo uu qabtay telefishinka oo su’aalo laga weydiiyay mowduuca, isagoo aan faahfaahin dheeraad ah ka bixin.

Source