Cabdirisaaq Cataash: “Waa khasaare in Reer SSCK u dhintaan qarannimada Soomaaliya”

[Deeq A.]

Cataash oo urur siyaasadeedkiisii Waaberi uga ololaynaya Caynaba 2022kii.

Laascaanood ( Faallo) —  Cabdirisaaq Ibraahim (oo loo yaqaanno Cataash) ayaa toddobaadkan bixiyay waraysi uu ku difaacay kaalintiisii siyaasadeed markuu ka tirsanaa maamulka Somaliland oo ka horjeeda qarannimada Soomaaliya. Cataash waraysiga uu bixiyay wuu dheer yahay hase ahaatee dhowr arrimmood oo uu ka hadlay ayaa mudan in la dul istaago.

Kaalintiisii Siyaasadda ee maamulka goosasho-doonka ee Somaliland

Cataash wuxuu sheegay inuu siyaasadda ku jiray isaga oo leh wax uu ku tilmaamay “falsafad” dhaafsiisan “mushaar la qaato”. Markii la su’aalay sababta uu maamul dadkiisu aysan taageersanayn ugu biiray, Cataash wuxuu ku jawaabay: “Dadkaygu ma mideysnayn.”  Wariyuhu ma su’aalin sababta uu Cataash ugu arkayay maamulka aamminsan kala goynta Soomaaliya, ahaana maamul dhibaato ku hayay dadka Sool (dil iyo xarig), mid dadkiisa meteli kara. Cataash dano ganacsi ayuu ku lahaa Hargeysa. Waddada uu danahaas ganacsiga u maray waxay ahayd xil wasiirnimo muddo kooban, iyo kaddib in loo dhoodhoobay urur siyaasadeed la odhan jiray Waaberi.

Cataash wuxuu sheegay in ka badan 140 qof lagu dilay Laascaanood, hase haatee ay taasi horseedday in dagaal uu dhaco kaddibna uu maamul la aqoonsan yahay dhismo (maamulka Sool, Sanaag, Cayn, iyo Khaatumo.) Intii maamulka Somaliland uu ka talinayay Laascaanood wuxuu ku tiirsanaa caaglayaashii uu hoggaamin jiray Mahad Cambaashe oo dambiyo badan galay.  Cataash iyo Cabdirisaaq Khaliif, oo ahaa afhayeenka baarlamaanka maamulka Somaliland, waxay ka mid ahaayeen raggii difaaci jiray siyaasaddii maamulka  Somaliland uu sanadkii 2021kii dad Soomaaliyeed si qasab ah uga barakiciyay Laascaanood iyo dagaalkii maamulka  Somaliland 2012kii ku qaaday Kalshaale. Cataash, Xaglatoosiye iyo Cabdirissaq Khaliif waxay ahaayeen dadka loo yiqiin horgalayaal, inkastoo ay kala xilal duwanaayeen oo siyaasadda goosasho-doonka ku kala biireen muddooyin kala duduwan. Cataash wuxuu iskaga baxay siyaasadda goosasho-doonka Febraayo 2023kii intii uu socday dagaalkii Laascaanood; Xaglatoosiye iyo Cabdirisaaq Khaliid, sidoo kale.

Midnimada Soomaaliya

Cataash wuxuu ku dooday in dadka maamulka Sool, Sanaag, Cayn iyo Khaatumo ay ku khasaareen inay difaacaan midnimada Soomaaliya. Sababta maamulka goosasho-doonka ee Somaliland u duqaynayay  Laascaaood 2023kii oo u laayay in ka badan 800 oo qof una dhaawacay ku dhowaad 3000 oo qof waa Muuse Biixi oo ku doodayay in Laascaanood aysan ka mid ahayn Jamhuuriyadda Federaalka Soomaaliya. Cataash si dadban ayuu difaacay mabda’a Muuse Biixi ku duqeeyay Laascaanood 2023kii. Cataash wuxuu meel kaga dhacay jamaahiirtii u dhimatay halganka iyo jamaahiirtii dhaawacu soo gaaray, dadkii barakacay iyo dadkii ku hanti beelay duqeyntii ciidammadii goosasho-doonku u geysteen Laascaanood. 

Sida Wadahadal u dhexmari karo maamulka SSCK iyo maamulka Somaliland

Cataash wuxuu is weyddiiyay haddii lala hadlayo maamulka goosasho-doonka ee Somaliland si colaadda loo soo afjaro, ma waxaa lagula hadlayaa magaca maamulkii Khaatumo oo 2017kii  heshiiska la galay AUN Silaanyo, mise magaca maamulka hadda jira ee SSCK?  Waxaa xusid mudan in “maamulkii Khaatumo” uu hoggaaminayay AUN Cali Khaliif Galaydh uu taageeray in la weeraro Puntland 2018kii dagaalkii Tukaraq, mana ahayn maamul dadka SSCK metelayay. Sanadkii 2018kii kulan dhexmaray Galaydh iyo Muuse Biixi wuxuu ku dhammaaday fashil kaddib markii Biixi ku dooday in Galaydh uusan metelin dadka Khaatumo iyo inuu si shaqsi ah heshiis ula galay xukuumaddii Siilaanyo 2017kii. Kulankaas kaddib Galadyh wuxuu u leexday wax loo bixiyay tabliiq siyaasadeed, oo isaga iyo Axmed Ismaaciil Samatar ay ku booqan jireen Boorame iyo Burco si ay uga qeybgalaan doodo siyaasadeed.

Hanka siyaasadeed ee horgale

Cataash wuxuu miiska soo saary dhibaato haysata maamulka SSCK oo ah: sida loola dhaqmayo horgalayaasha leh han siyaasadeed si ay ugu soo biiraan mamaulka SSCK. Dadkii ehelada ku waayay dagaalkii Laascaanood iyo dadkii dhibaatadu soo gaaray intii taliskii caagle sare Mahad Canbaashe ka amar-ku-taaglaynay Laascaanood waxay aamminsan yihiin in  horgale uusan marnaba kaalin siyaasadeed ku yeelanin maamulka SSCK.

Cataash waa siyaasi qarinaya gaboodfalka maamulka goosasho-doonku kula kacay dadka SSCK maadaama uu Cataash ku dooday in ay khasaare tahay in dadka SSCK u dhinteen  midnimada Soomaaliya. Ilaalinta midnimada Soomaaliya waxaa looga soo gurmaday Caluula ilaa Gaalkacyo. Dadku waxay kale oo difaacayeen sharaftooda iyo xaqooda siyasadeed ku salaysan Soomaaliya midaysan siyaasad iyo dhul ahaan. Waraysiga uu bixiyay Cataash waa mid dadka baray wejiga dhabta ah ee horgale han siyaasadeed iyo dano ganacsi weli leh. 

 © Siciid M. Sheekh Cali

The post Cabdirisaaq Cataash: “Waa khasaare in Reer SSCK u dhintaan qarannimada Soomaaliya” appeared first on Puntland Post.