Qarax Ka Dhacay Agagaarka Xarunta Ciidanka ee lagu magacaabo Mogadishu ee Nigeria

[Deeq A.]

Abuja, Nigeria –Qarax xooggan ayaa ka dhacay saldhig basaska laga raaco oo ku dhow xarunta ciidamada milateriga ee loo yaqaan Mogadishu Cantonment ama Abacha Barracks, taasoo ku taalla degmada Asokoro ee magaalada Abuja dalka Nigeria.

Qaraxa ayaa sababay dhimashada hal qof oo looga shakisan yahay inuu ahaa ismiidaamiye, iyadoo labo qof oo kale ay ku dhaawacmeen.

Saraakiisha ciidamada milatariga iyo booliska Nigeria ayaa xaqiijiyay in qaraxu dhacay abbaaro 2:50 galabnimo, ayna si degdeg ah u tageen goobta si ay xaaladda u xakameeyaan.

Wararka ayaa sheegaya in ninkii isqarxiyay uu watay lix madfac oo la tuhunsan yahay inuu doonayay inuu gudaha magaalada la galo. Waa la joojiyay isagoo kusii jeeda bartamaha magaalada, waxaana la sheegay inuu kasoo baxay dhanka Nyanya-Mararaba ee ku yaalla duleedka Abuja.

Markii la joojiyay, ayuu is qarxiyay, taasoo keentay inuu isla goobta ku dhinto. Mid kamid ah dadkii dhaawacmay ayaa loola cararay isbitaalka, halka kan kale dhaawac fudud uu qabay.

Waxaa la xasuustaa in sanadkii 2010 uu qarax kale ka dhacay isla xaruntan, markaasoo dad badan ay ku dhinteen, waxaana loo aaneynayay kooxda Boko Haram.

Fiiro Gaar ah:

Inkasta oo xarunta la yiraahdo Mogadishu Cantonment, ma aha Muqdisho caasimadda Soomaaliya. Waa xarun ciidan oo ku taalla Abuja, Nigeria, oo loogu magac daray “Mogadishu” si taariikhi ah.

Source: goobjoog.com