Xog: Shir xasaasi ah oo berri u furmaya mucaaradka iyo kala shaki xalay soo ifbaxay

[Deeq A.]

Muqdisho (Caasimada Online) – Murashaxiinta Mucaaradka ah ayaa lagu wadaa in maalinta berri ah uu shir-weyn uga furmo magaalada Muqdisho oo maalmihii lasoo dhaafay ay isugu yimaadeen, iyagoo saacadihii lasoo dhaafay ku jiray kulamo siyaasadeed oo xasaasi ah.

Shirweynaha berri mucaaradka Muqdisho uga furmaya waxay uga hadli doonaan xaaladda Soomaaliya ee siyaasadda, doorashada, dastuurka iyo amniga, iyadoo Villa Somalia ay diidan tahay shirkaan.

Xogaha laga helayo shirkii xalay ay siyaasiyiinta mucaaradka ah ku yeesheen guriga Madaxweyne hore Sheekh Shariif ayaa sheegaya in la isla qaatay in dib loo dhigo dhismaha Madal ama Isbaheysi ay ku midoobayaan siyaasiyiinta mucaaradka ah.

Sida ay xog ku heshay Caasimada Online, sababta dib loogu dhigay dhismaha madashaas ayaa in uu jiro tuhun laga qabo xubnaha qaar oo weli u janjeera dhanka Madaxweyne Xasan Sheekh oo haaya xukunka dalka.

Maalmaha soo socda waxaa jiri doona kulamo kale oo lagu balmay, kuwaas oo ku saabsan dhismaha isbaheysiga cusub iyo in mucaaradku iska dhex-doortaan hoggaamiye.

Sido kale, ilo wareedyada noo waramay waxay sheegeen in Mucaaradku ay si hordhac ah iskula qaateen in ay Afhayeen ka dhigtaan Cabdullaahi Sheekh Xasan, halka Maxamed Aadan Koofi ay ka dhigteen isku-duwaha Madasha (Coordinator).

Marka la eego sida ay ku bilaawdeen dhaqdhaqaaqyada mucaaradka dowladda Madaxweyne Xasan Sheekh waxaa ka muuqata in aysan diyaarsaneyn, tuhun dhaxdooda ah oo jira iyo in aysan ilaa hadda ka muuqan saameyntii laga filayay.

Dowladda Federaalka ayaa dhankeeda qorsheyneysa inay la kulanto mucaaradka, kana tala-geliso waxyaabaha uu muranku ka taagan yahay, waxaana socota qiimeynta hanaankii loo qaban lahaa gogosha u uku baaqay Madaxweyne Xasan Sheekh.

Intaas waxaa dheer, in xubnaha mucaaradka qaarkood ay Madaxweyne Xasan Sheekh la yeesheen kulamo qaarkood la qariyey, qaarna la shaaciyey, taasi oo qeyb ka ah kala shakiga mucaardka dhexdiisa ka taagan.