Kenya oo Mar Kale Xaqiijisay Madax-Bannaanida Soomaaliya, Xilli Madaxweynaha Somaliland Ku Sugan Yahay Nairobi

[Deeq A.]

Dowladda Kenya ayaa maanta si rasmi ah caddeysay inay si buuxda uga go’an tahay ilaalinta madax-bannaanida, midnimada dhuleed, iyo wadajirka siyaasadeed ee Jamhuuriyadda Federaalka Soomaaliya.

Qoraal rasmi ah oo ka soo baxay Wasaaradda Arrimaha Dibadda ee Kenya ayaa lagu sheegay in Nairobi ay si aan shaki ku jirin u aqoonsan tahay Dowladda Federaalka ee Soomaaliya ee fadhigeedu yahay Muqdisho inay tahay hay’adda kaliya ee sharciyeysan ee mas’uulka ka ah dhammaan arrimaha gudaha ee dalka Soomaaliya, oo ay ku jiraan gobollada dalka oo dhan.

Qoraalka ayaa si gaar ah u xusay in Kenya ay ilaalinayso mabaadi’da aan faragelinta lagu sameynin arrimaha gudaha ee dal kale, iyadoo lagu saleynayo Axdiga Qaramada Midoobay, Midowga Afrika, iyo heshiisyada Urur Goboleedka Bariga Afrika (EAC).

Kenya waxa ay sidoo kale muujisay in xidhiidh kasta oo lala yeesho maamul-hoosaadyada sida Jubaland iyo Somaliland ay noqon doonaan kuwo lala tashado Dowladda Federaalka Soomaaliya, isla markaana aan la micno ahayn aqoonsi dowladeed oo rasmi ah.

Dhanka kale, Mudane Cabdiraxmaan Maxamed Cabdillaahi (Cirro), ayaa maanta safar shaqo oo dhawr cisho soconaya ku tegay magaalada Nairobi ee caasimadda dalka Kenya. Madaxweynaha waxaa safarkiisa ku weheliya wasiirro iyo masuuliyiin sare oo ka tirsan Xukuumadda Somaliland. Intii uu ku sugnaa Nairobi, Madaxweynaha waxa uu la kulmi doonaa madaxda Kenya, hay’ado caalami ah, iyo wakiillo ka tirsan safaaradaha dalalka waaweyn ee fadhigoodu yahay Nairobi.

Source: goobjoog.com