Britain, Canada iyo France oo soo saaray bayaan xasaasi ah oo ay ugu hanjabeen Israel

[Deeq A.]

London (Caasimada Online) – Hoggaamiyeyaasha Britain, France iyo Canada ayaa Isniintii si adag u cambaareeyay waxa ay ku tilmaameen “falal xadgudub ah” oo Israel ka waddo Marinka Gaza, iyaga oo uga digay inay qaadi doonaan tallaabooyin mideysan haddii Israel aysan joojin weerarka milatari ee sii kordhaya iyo xayiraadda saaran gargaarka bani’aadannimo.

Ra’iisul Wasaaraha Britain Keir Starmer, Madaxweynaha Faransiiska Emmanuel Macron iyo Ra’iisul Wasaaraha Canada Mark Carney ayaa si gaar ah u cambaareeyay diidmada Israel ee gargaarka iyo hadallo ka soo yeeray wasiirro ka tirsan xukuumadda Netanyahu oo ku hanjabay in si ballaaran loo masaafuriyo dadka Falastiiniyiinta ah.

“Ma eegi doonno iyadoo dowladda Netanyahu ay sii waddo falalkan xadgudubka ah. Haddii Israel aysan joojin weerarrada cusub iyo xayiraadda gargaarka, waxaan qaadi doonnaa tallaabooyin dhab ah oo ka dhan ah,” ayay hoggaamiyeyaashu ku sheegeen bayaan wadajir ah.

Inkasta oo aysan caddeyn nooca tallaabooyinka la qaadi doono, waxay intaas ku dareen: “Waxaan naga go’an in aan aqoonsanno dawlad Falastiini ah oo qeyb ka ah xalka laba-dowladood ah, waxaana diyaar u nahay in aan kala shaqeyno waddamada kale sidii loo xaqiijin lahaa arrintaas.”

Bayaankan ayaa ku beegmay baaq kale oo ay si wadajir ah u soo saareen 22 dal—oo ay ku jiraan Britain, France iyo Canada—kaas oo Israel looga codsaday in ay si degdeg ah u fasaxdo “gargaarka buuxa ee Gaza,” iyada oo la xusay in shacabka ku nool Marinka Gaza ay wajahayaan “macaluul baahsan.”

Israel ayaa Gaza ku haysay go’doon gargaar tan iyo 2-dii Maarso, balse Isniintii waxay sheegtay in ay oggolaan doonto tiro kooban oo gaadiid gargaar ah in ay gudaha galaan.

Ra’iisul Wasaare Netanyahu ayaa sheegay in oggolaanshaha xadidan ee gargaarka uu yimid si looga hortago in “sawirrada muujinaya macaluul baahsan” ay dhaawacaan sharciyadda dagaalka uu dalkiisu wado.

Bayaan ay wadajirka u soo saareen Britain, France iyo Canada ayaa si kulul u cambaareeyay diidmada Israel ee gargaar muhiim u ah dadka rayidka ah, taasoo ay ku tilmaameen mid aan la aqbali karin isla markaana laga yaabo inay jebiso xeerarka bini’aadannimo ee caalamiga ah.

Sidoo kale, waxay cambaareeyeen “hadallada nacasnimo iyo naceybka leh” ee dhawaan kasoo yeeray qaar ka mid ah xubnaha dowladda Israel, kuwaas oo ku hanjabay in shacabka Gaza ay iyagu bilaabi doonaan barakac baahsan sababo la xiriira burburka dagaalka.

Hoggaamiyeyaashu waxay caddeeyeen in “barakicinta qasab ah ee joogtada ah ay jebinayso sharciga caalamiga ah ee bini’aadantinimo.”

Netanyahu oo si caro leh uga jawaabay

Ra’iisul Wasaare Netanyahu ayaa si kulul uga falceliyay bayaanka kasoo baxay London, Paris iyo Ottawa, isagoo ku tilmaamay hadalkooda “abaal-marin weyn” oo la siiyay kooxda Hamas.

“Marka hoggaamiyeyaasha London, Ottawa iyo Paris ay naga dalbanayaan in aan joojino dagaalka aan ku difaacayno jiritaankeena, isla markaana ay ku cadaadinayaan in la aqoonsado dawlad Falastiini ah, waxay abaal marin u fidinayaan weerarkii xasuuqa ahaa ee 7-dii October, waxayna dhiirrigelinayaan dambiyo kale oo la mid ah,” ayuu yiri Netanyahu, isagoo xusay weerarkii Hamas ee 2023 ee sababay dagaalka hadda socda.

Netanyahu wuxuu ugu baaqay dhammaan hoggaamiyeyaasha Yurub in ay ku daydaan madaxweynaha Mareykanka Donald Trump oo uu ku tilmaamay mid si buuxda u garab istaagay Israel.

“Dagaalku wuxuu dhammaan karaa berri haddii la sii daayo dhammaan la haysteyaasha, Hamas ay hubka dhigto, hoggaamiyeyaasheeda la musaafuriyo, Gaza-na laga dhigo deegaan aan milatari ahayn. Qaran kasta wuxuu xaq u leeyahay in uusan aqbalin wax ka yar intaas—Israel-na marnaba ma aqbali doonto,” ayuu yiri.

“Dagaalkan waa dagaal u dhexeeya ilbaxnimo iyo arxandarro. Israel waxay sii wadi doontaa is-difaaceeda si sharciyeysan ilaa ay gaarto guul buuxda.”

Milatariga Israel ayaa xoojiyay weerarrada ka socda Gaza, iyagoo weli ka falcelinaya weerarkii 7-dii October 2023 ee ay fulisay kooxda Hamas. Sida lagu sheegay tiro-koob uu sameeyay AFP oo ku saleysan xog rasmi ah, weerarkaasi wuxuu sababay dhimashada 1,218 qof oo u badan rayid.

Wasaaradda Caafimaadka ee Gaza ayaa Isniintii sheegtay in ugu yaraan 3,340 qof lagu dilay tan iyo markii Israel dib u billowday duqeymaha 18-kii Maarso, taasoo tirada guud ee dhimashada dagaalka ka dhigeysa 53,486.